پرۆژه‌ی چاودێریی ئازیزانی ده‌زگای خێرخوازیی بارزانی بۆ یارمه‌تیدانی منداڵانی بێباوك له هه‌رێمی كوردستان، به‌هاوكاری خێرومه‌ند و ده‌وڵه‌مه‌ند و سه‌رمایه‌دارانی هه‌رێمی كوردستان له قۆناغی كوردستان، مووچه‌ی 4 مانگ به‌سه‌ر 4806 منداڵی بێ باوك (ئازیز)دا له هه‌ولێر و سلێمانی و دهۆك و گه‌رمیان دابه‌شده‌كات.
ئه‌مڕۆ چوارشه‌ممه 20ی كانونی 2016، له درێژه‌ی كارو چالاكییه‌كانی پرۆژه‌ی چاودێریی ئازیزانی ده‌زگای خێرخوازیی بارزانی، هاوكاری پرۆژه‌ی كوردستان كه تایبه‌ته به‌و كۆمه‌ك و هاوكارییه مادییانه‌ی له‌لایه‌ن ده‌وڵه‌مه‌ند و خێرومه‌ند و سه‌رمایه‌دارانی هه‌رێمی كوردستانه‌وه كافلی منداڵی بێباوكیان كردووه، پرۆژه‌كه ده‌ستی به دابه‌شكردنی مووچه كردووه، بۆ ئه‌مه‌ش له یه‌كه‌م وێستگه‌دا له شاری هه‌ولێر ده‌ستكرا به دابه‌شكردنی مووچه‌ی 4 مانگی مانگه‌كانی (5/6/7/8)ی ساڵی 2015 به‌سه‌ر ئازیزانی ئه‌و شاره‌دا كه خۆی له (1220)منداڵدا ده‌بینیه‌وه دابه‌شكرد.
موسا ئه‌حمه‌د، جێگری سه‌رۆكی ده‌زگای خێرخوازیی بارزانی رایگه‌یاند: "له‌گه‌ڵ خراپبوونی بارودۆخی ژیانی هاوڵاتیان و دواكه‌وتنی مووچه‌دا، ئێمه زۆر سوپاسی ئه‌و خاوه‌نكار و كه‌سایه‌تی و خێرخوازانه‌ی له‌ناوخۆی هه‌رێمی كوردستان ده‌كه‌ین كه به‌رده‌وام هاوكاری و پاڵپشتی پرۆژه‌كانی ده‌زگاكه‌مان ده‌كه‌ن".
جێگری سه‌رۆكی ده‌زگای خێرخوازیی بارزانی وتیشی: "زۆر سوپاسی ئه‌و كه‌سایه‌تی و خاوه‌نكار و ده‌وڵه‌مه‌ندانه‌ی كوردستان ده‌كه‌ین كه سه‌ره‌ڕای ئه‌و قه‌یرانه داراییه‌ی كه به‌رۆكی كوردستانی گرتووه، ئه‌وان زۆر به له‌خۆبوردووییه‌وه له‌گه‌ڵ پرۆژه‌كانی ده‌زگای خێرخوازیی بارزانی به‌رده‌وامن".
ئاماژه‌ی به‌وه‌شكرد: "ئه‌مڕۆش كه هه‌ڵده‌ستین به دابه‌شكردنی مووچه‌ی چوار مانگی ئازیزان له سه‌رتاسه‌ری هه‌رێمی كوردستان، هه‌ڵمه‌تی دابه‌شكردنه‌كه چه‌ند رۆژێك ده‌خایه‌نێت و له شاری هه‌ولێریش ده‌ستكرا به دابه‌شكردنی مووچه به‌سه‌ر 1220 منداڵی ئازیز، هاوكات له شار و شارۆچكه‌كانی ترش له رۆژانی داهاتودا پرۆسه‌كه به‌رده‌وام ده‌بێت و كۆی ئه‌و منداڵانه‌ی له‌م قۆناغه‌دا سوودمه‌ند ده‌بن بریتین له 4803 منداڵی بێ باوك و بڕی 961.200 $ی ئه‌مه‌ریكی ته‌رخانكراوه و به‌سه‌ریاندا دابه‌شده‌كرێت، كه بۆ هه‌ر مانگێك بڕی 50 $ ه‌و هه‌ر ئازیزێك 200$ی ئه‌مه‌ریكی وه‌رده‌گرێت".
