مەسرور بارزانی: لە هەرێمی کوردستان زەمینە و دەرفەتی وەبەرهێنان لەبارە

ئەمڕۆ پێنجشەممە 7ی ئاداری 2019 مەسرور بارزانی، کاندیدی سەرۆک وەزیرانی هەرێمی کوردستان بۆ خولی نۆیەمی ئەنجومەنی وەزیران  پێشوازی لە د. تاریق محەمەد ئەلحموری وەزیری پیشەسازی و بازرگانیی ئوردن  و شاندی یاوەری کرد.

لە دیدارەکەدا کە مونتەسر عوقلە باڵیۆزی ئوردن لە عێراق و هەیسەم ئەبوفول کونسوڵی گشتیی ئوردن لە هەولێر و ژمارەیەک بەرپرس و راوێژکار ئامادە بوون، وێڕای گفتوگۆکردنی پێشهات و پەرەسەندنەکانی ناوچەکە بەگشتی، پەرەپێدانی پەیوەندییە دووقۆڵییەکانی نێوان هەرێمی کوردستان و شانشینی ئوردن لە بوارە هەمەجۆرەکان تاوتوێ کران، لەەمبارەوە وەزیری  پیشەسازی و بازرگانی ئوردن ئاواتی سەرکەوتنی بۆ مەسرور بارزانی لە سەرۆکایەتیکردنی کابینەی نوێی حکوومەتی هەرێمی کوردستان و هیوای بەرەپێشچوونی زیاتری بۆ هەرێمی کوردستان خواست.

بەپیی زانیارییەکان لە کۆبونەوەکەدا مەسرور بارزانی رایگەیاندووە لە هەرێمی کوردستان زەمینە و دەرفەتی وەبەرهێنان لەبارە و هاتنی کۆمپانیاکانی ئوردن بۆ بەشداریکردن لە بووژانەوە و ئاوەدانکردنەوەی هەرێمی کوردستان بە پێویست دەزانین ئەمەش ئەوە دەگەیەنێت کە کوردستان دەرفەتی باشی وەبەرهێنان و برەودان بە کەرتی ئابووری هەیە و کابینەکانی پێشووتر مەبەستیان نەبووە گرنگی تەواوی پێبدەن.