هێزەكانی پێشمەرگە لە رۆژهەڵاتی باشیكەوە پێشڕەوییان كردووە و فەرماندەیەكی پێشمەرگە دەڵێ، دوو گوندی دیكە ئازاد كراونەتەوە و پێشڕەویی هێزی پێشمەرگەیش بەردەوامی هەیە.
(بەهرام عەریف یاسین)، فەرماندەی لیوای حەوتی وەزارەتی پێشمەرگە، رایگەیاند: "ئەمڕۆ هێزەكانی پێشمەرگە پێشڕەوییان كرد لە رۆژهەڵاتی ناحیەی باشیك و توانییان هەردوو گوندی كانوونە و رۆژبەیان لە رۆژهەڵاتی ناحیەی باشیك ئازاد بكەنەوە و، تیرۆریستانی داعشیش پاشەكشەیان بۆ نێو سەنتەری ناحیەی باشیك كرد و نەیانتوانی بەرگری لە خۆیان بكەن".
(بەهرام) گوتیشی: "بە گرتنەوەی ئەو دوو گوندە، پێشمەرگە نزیكتر دەبێتەوە لە سەنتەری ناحیەی باشیك و گوندی بەحزانیش لە ڕووی سەربازییەوە دەكەوێتە ژێر دەستی پێشمەرگە، پیشڕەوییەكانیش بەردەوامییان دەبێت تا ئەو سنوورەی بۆمان دیاری كراوە".
