نوێترین

recent

08/08/2015

یەکگرتوو: تەسلیم بە خواستی پارتی نابین

yakgrtu-nwe

یەکگرتووی ئیسلامی دەنگۆی تەسلیمبوون بە ویستی پارتی دیموکراتی کوردستان رەتدەکاتەوەو پەرلەمانتارێکی فراکسیۆنی یەکگرتووش لەپەرلەمانی کوردستان رایدەگەیەنێت: ھەرکەسێک وای وتووە، قسەی گیرفانی خۆی کردووەو بەھەموو شێوەیەک ئەو لێدوان و قسانە رەتدەکەینەوە.

محەمەد بازیانی رێکخەری بزووتنەوەی چاکسازی و گەشە لەلێدوانێکی رۆژنامەنووسیدا رایگەیاندبوو “پێدەچێت پارتی دەنگی ھەر ١٠ پەرلەمانتارەکەی یەکگرتووی مسۆگەر کردبێت و دانیشتنی نائاسایی پەرلەمان نیساب وەرنەگرێت”.
 
لە وەڵامی ئەو لێدوانەشدا، مەلا غەیب پێنجوێنی، ئەندامی فراکسیۆنی یەکگرتووی ئیسلامی لەپەرلەمانی کوردستان  رایگەیاند: ئەو کەسە قسەی گیرفانی خۆی دەکات، قسەکردنی بێ بەڵگەش عەیبدارییە بۆ ئینسان، بۆیە سەرلەبەری ئەو لێداوانە رەتدەکەینەوە.

وتیشی: “ھیچ فشارێکمان لەسەر نییە بۆ بەشداریکردن و نەکردن لەکۆبوونەوەی نائاسایی پەرلەمان و ھیچ بڕیارێکیش نەدراوە، چونکە ھێشتا پرسەکە لە لیژنەی یاساییدایەو بڕیاری کۆبوونەوەی نائاسایی پەرلەمانیش نەدراوە”.

دەنگۆی ئەوە بڵاوکرایەوە کە لەحاڵەتی نەگەیشتنی لایەنە سیاسییەکان بەڕێککەوتن لەسەر پرسی سەرۆکایەتی ھەرێم، پەرلەمانی کوردستان رێکارە یاساییەکانی خۆی دەگرێتەبەرو یەکگرتووش ئیمزای خۆی دەکێشێتەوەو لەحکومەتیش دەکشێتەوەو دەبێتە ئۆپۆزسیۆن.

لەبارەی ئەو دەنگیانەش، پەرلەمانتارەکەی یەکگرتوو دەڵێت:” ئەوە تەنھا قسەیەو ھیچی تر، بەھیچ شێوەیەک سەرکردایەتی یەکگرتوو بڕیاری لەو شێوەیەی نەداوە، تەنھا تاوتوێکردن و ھەڵسەنگاندنی دۆخەکەیە”.

بەوتەی ئەو ئەندامەی فراکسیۆنی یەکگرتوو، ئەگەر دانیشتنی نائاسایی کرا، ھیچ کوتلەیەکی پەرلەمانی جورئەتی ئەوە ناکات پشت لەئەرکەکەی خۆی بکات و بەشدار نەبێت، “بۆیە پێموایە ھەموو پەرلەمانتارەکان بەشداری کۆبوونەوەی نائاسایی دەکەن، تەنھا فراکسیۆنی زەرد بەشداری ناکات، ھاوشێوەی دانیشتنەکەی ٢٣ی حوزەیران”.

واچاوەڕوان دەکرێت، سبەینێ ٩ی ئاب راپۆرتی لیژنەی یاسایی پەرلەمان سەبارەت بەھەمواری یاسای سەرۆکایەتی ھەرێم رەوانەی سەرۆکایەتی پەرلەمان بکرێت، سەرۆکایەتیش دانیشتنێکی نائاسایی بۆ گفتوگۆکردن لەسەر ناوەڕۆکی ئەو راپۆرتە رێکبخات.


from Wllat Net http://ift.tt/1NhLH0H
via IFTTT
Picsart-24-02-23-21-31-09-085