عەبدوڵا کوێخا موبارەک کە فەرماندەیەکی سەربازی پارتی دیموکراتی کوردستانە، هێرشی توند دەکاتەسەر بەرپرسانی هەرێم و دەڵێت،" خەڵک دەیانەوێت قوت و بژێویان لە دەستی تەیف سامیدا بێت بەهۆی بێ متمانەیی و دەس پیسی ئێوەوە ".
عەبدوڵا کوێخا موبارەک لەپەیامێکدا کە لەهەژماری تایبەتی خۆی لە تۆڕی کۆمەڵایەتی فەیسبوک بڵاویکردەوە، باسی لەوەکردوە،" باسی قەیرانی دارایی، بێ موچەیی و برسێتی خەڵک، کەمی خزمەتگوزاری و هێرشی درۆن بۆ سەر کوردستان ناکەین کە زۆر باسکراوە و ئاشکرایە بە چی نیەت و مەرامێک ئەو کێشانە دژی کورد دروست دەکرێن، هەرچەند ئەمەش بەشێکی بەهۆی بێ توانایی و کەم تەرخەمی ئێوەوەیە ".
عەبدوڵا کوێخا موبارەک لەپەیامەکەیدا دەڵێت، ئەوەی کارەسات و شەرمەزاریە ئەمانەن:
-خەڵک دەیانەوێت قوت و بژێویان لە دەستی تەیف سامیدا بێت بەهۆی بێ متمانەیی و دەس پیسی ئێوەوە.
-خەڵک دەیانەوێت دەستبەرداری ئەو هەموو قوربانیدانەیان و سەروەریە نەتەوەیی و نیشتیمانیەکانیان بن و بگەڕێنەوە باوەشی عێراق و سودانی لە داخی ئێوە.
-خەڵک ئەوەندە لێتان بێزارە شوێنی شەیتانیش دەکەون و پشتیوانی دەکەن ئەگەر دژی ئێوە بێت.
-خەڵک حەزدەکەن خۆیشیان لە ئاگرێکدا بسوتێن تەنها بەو هیوایەی ئێوەش بسوتێن.
ئەو فەرماندە سەربازییەی پارتی وتیشی،" ئاخر کاری چەند ساڵەی ئێوە حکومڕانی و ئیدارەدانی خەڵک نەبووە، بەڵکو تەنها خەریکی قومار و کەیفوسەفای خۆتان و لە خەمی کۆمپانیا و منداڵەکانی خۆتان بوون،
بۆیە ئەگەر خوا بکا هەموو سەروەریەکانتان لە دەست نەدابێت ئیتر شەرم و حەیا بتانگرێت ئەگەر هەتانە "
سەرچاوە شار پرێس..
