پرسی سه‌رۆکایه‌تی هه‌رێم له‌لوتکه‌ی ده‌سه‌ڵاته‌وه بۆ ئاساییترین هاوڵاتیانی هه‌رێمی سه‌رقاڵکردوه، به‌شێوه‌یه‌ک به‌شێک له‌هاوڵاتیان ده‌ڵین بابه‌ته‌که “وه‌ک نه‌خۆشی ده‌رونی لێ هاتوه“.
ئا: ئیمان زه‌ندی
• گۆران، پۆلیسێکی هاتوچۆیه‌و سه‌ره‌ڕای به‌رزی پله‌ی گه‌رما، به‌ڵام به‌رده‌وامه له‌کاره‌که‌ی‌و رۆژانه جوڵه‌ی ئوتومبێلی سه‌رشه‌قامه‌کان رێکده‌خت، له‌باره‌ی پرسی سه‌رۆکایه‌تی هه‌رێمه‌وه ده‌ڵێت “ئه‌و بابه‌ته کاری له‌هه‌مو خه‌ڵک کردوه‌و وه‌ک نه‌خۆشی ده‌رونی لێهاتوه“.
ئه‌و پۆلیسه تێبینی ئه‌وه‌ی کردوه که ئه‌و قه‌یرانه جاده‌کانی به‌ڕێژه‌یه‌ک چۆڵکردوه‌و “خه‌ڵک تاقه‌تی کاریان نه‌ماوه” ئه‌وه‌ش کاری ئه‌وانی ئاسان کردوه، وه‌ک خۆی ده‌ڵێت. هه‌روه‌ها پێی وایه هێنانه‌پێشه‌وه‌ی ئه‌و قه‌یرانه، بۆ له‌بیربردنه‌وه‌ی قه‌یرانه‌کانی دیکه‌ی وه‌ک موچه‌و کاره‌باو ئه‌وانی دیکه‌یه.
• هیوا قادری ته‌مه‌ن 50 ساڵ، له‌سه‌ر شه‌قامی مه‌وله‌وی شاری سلێمانی دوکانێکی چاپی هه‌یه‌و له‌پاڵ ئه‌و ئامێره‌دا ژیانی رۆژانه‌ی به‌ڕێده‌کات، له‌و باره‌یه‌وه ده‌ڵێت “ده‌بێت هه‌ر ماوه‌یه‌ک یه‌کێک سه‌رۆک بێت‌و دواتر جێی بهێڵێت، به‌ڵام ئه‌م سه‌رۆکه‌ی خۆمان جگه له‌وه‌ی هه‌شت ساڵی خۆی ته‌واوکرد، دو ساڵیشیان بۆ درێژکرده‌وه، واته هێشتا دو ساڵ قه‌رزاره“.
له‌باره‌ی کاریگه‌رییه‌کانی ئه‌و قه‌یرانه له‌سه‌ر بازاڕ، ده‌ڵێت “به‌هۆی ئه‌و پرسه‌وه ماوه‌یه‌که بازاڕ وه‌ستاوه، چونکه‌که‌س نایه‌ته دره‌وه‌و بازاڕ چۆڵ بوه، خه‌ڵک چاوه‌ڕوانی وه‌ڵامی کۆتاییه“.
• فه‌ریده ئه‌حمه‌د که ماوه‌ی 15 ساڵه مامۆستایه، به‌دڵێکی سارده‌وه باسی پرسی سه‌رۆکایه‌تی هه‌رێم ده‌کات، “ماوه‌یه‌کی زۆره ئه‌م پرسه خه‌ڵکی سه‌رقاڵکردوه به‌خۆیه‌وه، که‌سانی دیکه هه‌ن که خزمه‌تی زیاتریان به‌کوردستان کردوه‌و ئه‌وانیش شایه‌نی ئه‌وه‌ن ببن به‌سه‌رۆکی هه‌رێم”.
ماوه‌ی زیاتر له‌دو مانگه له‌نێوان لایه‌نه سیاسییه‌کانی هه‌رێمدا دانیشتن‌و کۆبونه‌وه‌ی چڕوپڕ هه‌یه، به‌ڵام تائێستا پرسی سه‌رۆکایه‌تی نه‌گه‌یشتوه‌ته چاره‌سه‌رێکی کۆتایی‌و خه‌ڵک ئه‌و وه‌ڵامه‌ی ده‌ستنه‌که‌وتوه، ئایا له‌دوای 20ی ئاب کێ سه‌رۆکی هه‌رێمه؟
• جه‌بار محه‌مه‌دی ته‌مه‌ن 73 ساڵ که شۆفێری تاکسییه به‌نیگه‌رانیه‌وه ده‌ڵیت “ته‌كسییه‌كه‌م وه‌ك عه‌ره‌بانه‌ی‌ده‌ستگێڕی لێهاتوه، ده‌بێت بگه‌ڕێم بۆ كه‌سێك تا بیگه‌یه‌نمه جێگه‌ی خۆی“. ده‌شڵێت “ئه‌م پرسی سه‌رۆكایه‌تییه‌وه‌ك یاری منداڵانی لێهاتوه، وه‌ك چۆن كاره‌باكه‌مان توشی گه‌شكه‌ی كردوین كه دێته‌وه، زۆر دڵمان پێیخۆشه“.
• هیوا گه‌نجێکی ته‌مه‌ن 29 ساڵه, جیاواز له‌هاوڵاتیانی دیکه، پرسی سه‌رۆکی هه‌رێم ئه‌وی به‌خۆیه‌وه سه‌رقاڵ نه‌کردوه، ئه‌و ده‌ڵێت “سه‌رقاڵبم به مۆبایله‌كانمه‌وه باشتره له‌گوێدانه پرسێك كه سودی جه‌ماوه‌ری تێدا نیه. له‌ڕاستیدا ده‌بێت سه‌رۆک هه‌ڵنه‌بژێرێته‌وه، چونكه ماوه‌یه‌كی زۆری بۆ درێژكرایه‌وه له‌پێشوتر”.
• به‌رهه‌م جه‌لال كه به‌شی میكانیكی له‌په‌یمانگا ته‌واو كردوه ته‌مه‌نی 24 ساڵه‌و به‌ده‌م سه‌رقاڵی به‌مۆبایله‌كه‌یه‌وه‌له‌دوكانه‌كه‌یدا ده‌ڵێت “بۆیه ئه‌م پرسه ئه‌وه‌نده درێژه‌ی كێشا, چونكه ویستویانه گه‌نج نه‌یه‌نه سه‌ر شه‌قامه‌كان ڕێگر نه‌بن له‌كاره‌كانیان، به‌هۆی ئه‌م مه‌به‌سته‌وه وایان له‌سه‌دان گه‌نج كردوه كه به‌ره‌و هه‌نده‌ران بڕۆن”.
• ئامانجی ته‌مه‌ن 25 ساڵ گه‌رمای خۆری مانگی ئاب ئاره‌قی به‌ده‌موچاویه‌وه هێنابویه خواره‌و به‌بێزارییه‌وه له‌و باره‌یه‌وه بۆچونی خۆی له‌وباره‌یه‌وه ده‌ربڕی‌و وتی “هه‌مو خه‌ڵك بێزار بون، ده‌چنه‌وه بۆ ماڵه‌وه هه‌واڵه‌كان باس باسی پرسی سه‌رۆكایه‌تیه، دێیته ده‌ره‌وه به‌هه‌مان شێوه هه‌موشی به‌زیانی خه‌ڵكی كوردستانه“.
ئه‌و، که پیشه‌ی شۆفێری پاسه وتیشی “به‌شێوه‌یه‌ك له‌كوردستان بێزارم هه‌مو كارێكم ته‌واو كردوه بۆ ڕۆشتنم بۆ ده‌ره‌وه‌ی كوردستان, چونكه جارێكی تر گوێمان له‌ناوی سه‌رۆك نابێته‌وه“.
from Wllat Net http://ift.tt/1Ej4mtg
via IFTTT
