وڵات _ تایبەت
شەوى ڕابردوو تەقە لە بارەگاى سەرەکى بزوتنەوەى گۆڕان لەگردى زەرگەتە کرا و
یەکێک لە پاسەوانەکانیان کوژرا.
میدیایى فەرمى بزوتنەوەى گۆڕان تائێستا هیچ بڵاوکراوەیەکى فەرمى لەبارەى
هۆکارى تەقەکردنەوەکەوە بڵاونەکردووەتەوە، تەنها ئاماژەى بۆ ئەوەکردووە،
پاسەوانێکیان بەناوى (ڕێبەند) لەکاتى تەقەکاندا تیرۆرکراوە.
 |
پاسەوانە کوژراوەکەى گۆڕان (ڕێبەند فهرهاد)
|
کێن ئەوانەى تەقە دەکەن؟
میدیاى فەرمى گۆڕان لەبارەى تەقەکەرەکانى هیچ
زانیارییەکیان بڵاونەکردووەتەوە بەڵام بەگوێرەى چەند سەرچاوەیەکى میدیایى ناو
گۆڕان تایبەت بە وڵات، مەترسییان هەیە دەستێکى شاراوە پەیوەندى نێوان گۆڕان و
یەکێتى تێکبدات.
بۆیە، لە شەوى ڕابردووداوە بەفەرمانى بەرپرسانى باڵاى
گۆڕان جەخت لەسەر ئەوکراوەتەوە کە نابێت ئەو پرسە وا گەورە بکرێت و زیاد لە پێویست
قەبارەى زیاد بکرێت.
گۆڕان ترسی لەچیە؟
هەر بەگوێرەى زانیارى ئەو سەرچاوەیە گۆڕان ترسى لەوە
هەیە، ئێران یان پارتى بیانەوێت بۆ سەرقاڵکردنى یەکێتى و گۆڕان و زۆنى سەوز سود
لەم دەرەفتانە وەربگرن کە بەهۆى نیگەرانى نێوان یەکێتى و گۆڕان هاتووەتە پێشەوە لە
پرسى تایبەت حکومەت.
خەلیل سەرکانى ئەندامى جڤاتى نیشتمانى بزوتنەوەى گۆڕان ئاشکراى دەکات،
بەلایانەوە ڕوونە کێ تەقەکانى کردووە بەڵام پڕۆسەکەیان بۆ پۆلیس و هێزە ئەمنیەکان
جێهێشتووە، داواشى لەهێزە ئەمنیەکان کرد بەرپرسانە مامەڵە بکەن".
هاوکات، سەرکەوت ئەحمەد، وتەبێژى پۆلیسى پارێزگاى سلێمانی هیچ سەرەداوێکى
ڕوونى لەبارەى تەقەکانەوە ئاشکرانەکر، ووتى: " لێکۆڵینەوەى ورد لە پڕۆسەکە
دەکەین و تەقەکەرەکان دەدۆزینەوە".
