سەرۆکایەتیی شارەوانیی دەربەندیخان ھۆشدارییەکی
بۆ سەرجەم شۆفێرانی سنوورەکەی بڵاو کردەوە.
ئەمڕۆ دووشەممە 25/3/2019، پەیجی فەرمیی
بەڕێوەبەرایەتیی ھاتوچۆی دەربەندیخان، لە تۆڕی کۆمەڵایەتیی (فەیسبووک)، ھۆشدارییەکی
سەرۆکایەتیی شارەوانیی دەربەندیخانی بڵاو کردووەتەوە، داوا لە ھاوڵاتییان کراوە:
"بەھیچ شێوەیەک ڕێگاکانی دەرەوەی شار و ڕێگای سەر شاخی بەرانان بەکار نەھێنن،
بارودۆخی کەشوھەوا ئێجگار ئاڵۆزە".
سەرۆکایەتیی شارەوانیی دەربەندیخان ئەوەشی
خستووەتە ڕوو: "ڕێگای سیارە - بیرکێ پێویستی بە وشیاری لێخوڕین ھەیە".
لە ئێوارەی شەممەی ڕابردووەوە
23/3/2019، شەپۆلێکی بارانبارین ڕووی لە ھەرێمی کوردستان کردووە، بەڵام بەرەبەیانی
ئەمڕۆ دووشەممە کاریگەریی ئەو شەپۆلە بارانبارینە لەسەر ھەرێمی کوردستان زیاتر بوو
و بارانێکی بەخوڕ باری، ئێستا لە چەند ناوچەیەکی جیاوازی ھەرێمی کوردستان، ئاستی
ئاو بەرز بووەتەوە و چەند شەقامێکیش بەھۆی ئەو بارانبارینەوە داخراون.
