شاناز ئیبراهیم ئەحمەد بەرپرسی پەیوەندییەكانی یەكێتی نیشتیمانی كوردستان لە بریتانیا لە چاوپێكەوتنێكدا لەگەڵ گۆڤاری لڤین رایدەگەیەنێت: مەسعود بارزانی سەرۆكی پارتی شەرعیەتی نەماوەو دەبێت هەرچۆنێك بێت پەرلەمان كارا بكرێتەوە.
بەرپرسی پەیوەندییەكانی یەكێتی لە بریتانیا لە چاوپێكەوتنەكەدا رایدەگەیەنێت لەگەڵ دروستكردنی حكومەتی زۆریینە نییە لەگەڵ پارتی و پێشی وایە ئەو كارە ئینتیحارێكی گەورەیە بۆ یەكێتی و دەڵێت: ئەگەر هەندێك لە برادەران بۆ بەرژەوەندی تایبەتی كاری وا بكەن ئەوە غەدر لە یەكێتی دەكەن.
سەبارەت بە كۆبوونەوەكانی یەكێتی و پارتیش شاناز ئیبراهیم ئەحمەد دەڵێت: ئاگاداری ناوەرۆكی كۆبوونەوەكان نیم چونكە لە كۆبوونەوە شتێك دەڵێن و بۆ راگەیاندنیش شتێكی تر دەڵێن.
ئەو دەشڵێت: بەبۆچوونی من دەبوایە ئەو كۆبووونەوانە راستەوخۆ بوایەو هەموو كەس ئاگادار بوایە.
شاناز ئیبراهیم ئەحمەد پێشی وایە دەبێت وەڵامی سێ شت بدرێتەوە: یەكەم كاراكردنەوەی پەرلەمان بەجۆرێك ئەگەر ئەرز بدات لە ئاسمان دەبێت كارابكرێتەوە.
دووەم: گەرانەوەی وەزیرەكان و سێیەمیش هەمواركردنەوەی یاسای سەرۆكایەتی هەرێم و مەسەلەی نەوت.
سەبارەت بە شەرعیەتی مەسعود بارزانیش ، شاناز ئیبراهیم ئەحمەد دەڵێت: بارزانی شەرعیەتی نەماوەو و پۆستی سەرۆكی هەرێم لە هەرێمی كوردستان بوونی نییە.
لەبارەی پرسی نەوتیشەوە بەرپرسی پەیوەندییەكانی یەكێتی لە بریتانیا دەڵێت: منیش دەمەوێت بزانم بە چ هەقێك حزبێك رۆیشت بازرگانی بەسەر سەروەرت و سامانی ئەم میللەتەوە كرد؟
بەشێكی بەرچاوی چاوپێكەوتنەكەش تەرخانكراوە بۆ كێشە ناوخۆییەكانی یەكێتی نیشتیمانی كوردستان.
