سه‌رۆكی فراكسیۆنی پارتی دیموكراتی كوردستان له ئه‌نجوومه‌نی نوێنه‌رانی عێراق، ئاماژه به‌وه ده‌كات، كه بە هەوڵی مەسرور بارزانی، سەرۆکوەزیرانی کوردستان لەگەڵ محەمەد شیاع سوودانی، سەرۆکوەزیرانی عێراق، توانرا به‌شه بودجه‌ی عێراق و پشكی هه‌رێمی كوردستان دیار بكرێت و له‌سه‌ر حكوومه‌تی عێراقه، كه پێیەوە پابه‌ند بێت.
د.ڤیان سه‌بری، سه‌رۆكی فراكسیۆنی پارتی لە بەغدا، بۆ (باسنیوز) گوتی: "به هه‌وڵی سه‌رۆك وه‌زیرانی كوردستان و عێراقیش، توانرا بودجه‌ی گشتیی عێراق و پشكی هه‌رێمی كوردستان له‌و بودجه‌یه دیار بكرێت، كه به‌م شێوه‌یه‌یه 211 ترلیۆن و 900 ملیار دینار بۆ هەموو عێراق تەرخان کراوە، لەو بڕە پارەیەش 20 ترلیۆن و 910 ملیار دینار بۆ هەرێمی کوردستانە، کە نزیکەی 11 ترلیۆن و 600 ملیار دینار لەو بڕە بۆ مووچەی فەرمانبەران و چاودێریی کۆمەڵایەتییە.“
دەشڵێت: ”پێویستە مانگانە 965 ملیار دینار بۆ مووچەی فەرمانبەرانی هەرێمی کوردستان و چاودێریی کۆمەڵایەتی بێت.“
له‌باره‌ی دابه‌شكردنی مووچه پێش جه‌ژن، ڤیان سەبری رایگه‌یاند: ”لەنێوان حکوومەتی هەرێمی کوردستان و حکوومەتی عێراقی هەماهەنگیی باش هەیە، بۆیە حکوومەتی عێراق دەبێ پابەند بێ و مووچەکە بەر لە جەژن بنێرێت.“
ئه‌وه‌شی خسته روو: ”له‌و رۆژه‌وه‌ی ئه‌و بودجه‌یه په‌سه‌ند كراوه، دەبێ حكوومه‌تی عێراق پابه‌ند بێته به ناردنی مووچه و شایسته داراییه‌كانی هەرێمی كوردستان، ئەوەی گرنگە مووچەی فەرمانبەرانی هەرێمی کوردستان گەرەنتی کراوە کە مانگانە 965 ملیار دینارە و وەکوو فراکسیۆنەکانی کوردستانی لە بەغدا، چاودێریی جێبەجێکردنی یاسای بودجە دەکەین. هەروەها سەردانی مەسرور بارزانی، سەرۆکوەزیرانی كوردستان بۆ بەغدا، پێوەست بە چەندپرسیك گرنگ و لەپێناو مسۆگەرکردنی مووچەی فەرمانبەرانیش بوو.“
گوتیشی: نابێت پرۆسەی وردبینی لە پرسی مووچەدا، بگاتە دوو هەفتە و سێ هەفتە و ببێتە پاساو بۆ دواکەوتنی ناردنی مووچەی فەرمانبەران.
