لەسەر داوای ئیدارەی قەزای شنگال بۆ چۆڵکردنی بارەگا حکومییەکان لەلایەن ئەو ھێزانەی بەشدارییان لە رزگاکردنەوەیدا کردووە، پارتی دیموکراتی کوردستان سەرجەم ئەو بارگایانەی دەستی بەسەردا گرتبوو چۆڵدەکات، قایمقامی قەزاکەش رایدەگەیەنێت: تائێستا ھەپەگە و یەپەژە ھیچ بارەگایەکیان چۆڵ نەکردووە.
لەدوای کۆنترۆڵکردنی قەزای شنگال لەلایەن ھێزەکانی پێشمەرگەو گەریلاکانی ھەپەگەو یەپەژەوە، داوا کرا ھەرچی زووە حزبەکان لەنێو فەرمانگەکانی حکومەت کە کردویانە بە بارەگای حزبی، چۆڵی بکەن و ئەنجومەنی پارێزگای نەینەواش بەنووسراو داوای چۆڵکردنی ١٣ فەرمانگەی حکومی لە شنگال کرد، کە کرابوونە بارەگای حزبی.
مەحما خەلیل، قایمقامی قەزای شنگال ئاشكرایكرد : پارتی دیموکراتی کوردستان ١١ بارەگای حکومی چۆڵکردووە و یەکێتیش لەھیچ شوێنێکی حکومیدا نەبووە، بەڵام ھێزەکانی ھەپەگە و یەپەژە، تائێستا لەناو بارەگا حکومییەکاندا ماون و چۆڵیان نەکردووە.
قایمقامی شنگال کە لەسەر پشکی پارتی ئەو پۆستەی وەرگرتووە، ئاماژەی بەوەکرد چۆڵنەکردنی بارەگا حکومییەکان، پێشێلکردنی سیاسەتی عیراقەو جێگەی قبوڵیش نییە، وتیشی: ھەرچەندە ئەنجومەنی پارێزگای نەینەوا داوای لە ھێزەکانی سەر بە پەکەکە کردووە بارەگاکان چۆڵ بکەن، بەڵام ئەوان ھێشتا چۆڵیان نەکردووە و رێزیان لە دامودەزگاکانی میری و خەڵکی شنگال و شەھیدەکانیشی نەگرتووە.
