نوێترین

recent

13/08/2014

لەشكركێشییەكەی "داعش" بەرەو هەولێر؛ سیناریۆ بو؟


مه‌م بورهان قانع
لە روداوەكانی چەند رۆژی رابردودا و، هاوكات لەگەڵ گرتنی مەخمور و لەشكركێشی چەكدارەكانی "داعش"دا بەرەو هەولێر و، هاتنە دەنگی ئەمریكا بۆ بوردومانكردنی ئەو چەكدارانە و كۆتاییهێنان بەو ترس و دڵەڕاوكێیەی كورد و، پاشەكشەپێكردنی "داعش" لە بەرەكانی جەنگ دا لە ناوچە كوردستانییەكان، پەیامێكی راستەوخۆی ئەمریكییەكانە بۆ كورد، كە ئەگەر ئێمە نەبین، ئەوا لەماوەیەكی پێوانەیی زۆر كەم دا، "داعش" كۆتایی بە ئەزمونی هەرێمی كوردستان و خەونەكانتان دەهێنێت و، هەرێمی كوردستانیش دەخاتە ژێر جڵەوی دەوڵەتە خەڵافەتەكەیەوە.

شایەتیی ئەم پەیامەیش، ناڕاستەوخۆ لە چونیەكی بۆچونەكانی نێو پەیوەندییە تەلەفۆنییەكەی دوێنێ‌ (12/8)ی نێوان بارزانی و جۆ بایدن-ی جێگری سەرۆكی ئەمریكادا دەركەوت، كە هەردولا هاوڕابون لەوەی پشتیوانی بكەن لە پڕۆسەی سیاسیی عیراق، لەكاتێكدا پێشتر زمانی بارزانی و سەركردەكانی كورد بەرانبەر بە ئەمریكا بەمجۆرە نەبو و، بگرە زیاتر هەر باسی ریفراندۆم و رەوایی راگەیاندنی دەوڵەتی كوردیی دەكرا (وەك لە كۆبونەوەكەی چەند هەفتەی رابردوی بارزانی و سەركردەكانی كورددا لەگەڵ جۆ بایدن دا لە هەولێر، بیستمان)، هەروەكچۆن بە پەلە پروسكێیش،‌ پارلەمانی كوردستان دانیشتنێكی ئەنجامدا و، یاسایەكی تایبەتی بۆ چۆنێتیی ریفراندۆم و رێوشوێنەكانی دەركرد.
كەواتە:
بە بڕوای متەوازیعی من، لەشكركێشییەكانی چەند رۆژی رابردوی "داعش" لەناوچە كوردستانییەكان و، دروستبونی ئەو ترس و دڵەڕاوكێیە لە هەرێمی كوردستان دا، بە تایبەتی لە هەولێری پایتەخت، بەشێك بوە لە سیناریۆ و ئەجێندای ئەمریكا لە عیراق و هەرێمی كوردستان، وەكچۆن ئەمریكا قودرەتی هێندەیە لە دروستكردنی فشاردا، كە نەك دەتوانێت فشار لەسەر هەرێمێكی بچوكی وەكو هەرێمی كوردستان دروستبكات (وەكچۆن دروستی كرد)، بەڵكو لە توانایدایە فشاری گەورەتر بۆ وڵاتە زلهێزەكانی ناوچەكەش دروست بكات و، بەمەیش كارتگەلێكی بەدەستەوەیە، كە دەتوانێت هەر كات بیەوێت، ئاڕاستە و بڕیارەكانی سەركردە و سیاسییەكانی ئەم ناوچەیە جڵەو بكات و، وەكو شەترنجزانێكی لێوەشاوەی هاوشێوەی كاربۆڤ و كاسبارۆڤ (لەیاری شەترنج دا)،بەڵام ئەم لە گەمەی سیاسەت دا، بڕیاردات لە چ ساتەوەختێك دا سەرباز بجوڵێنێ‌ و كەی قەڵا و كەی ئەسپ و كەی فیل و كەی وەزیریش بخاتە بەردەم پاشا و كش مات بكات!

هێندەی سەری لێ‌ دەربكەم، پێموایە هێشتا لە ناوەڕاستی گەمەكانی ئەمریكاداین سەبارەت بە ئایندەی پێكهاتەكان لە عیراق دا، عیراقێك، كە بە فشاری ئەمریكا پێكەوە بەستراوەتەوە، بەڵام وەكو دیفاكتۆ، پەرت و لێكهەڵوەشاوە و، تەنها "كۆشكی سپی" و داڕێژەرانی سیاسەتی ئەو وڵاتە دەزانن؛ ئەو ساتەوەختە كەیە كە بڕیاری كۆتایی دەدەن بۆ هەڵوەشاندنەوەی یەكجارەكیی ئەم وڵاتە و ئایندەی كورد لەم وڵاتە.
Picsart-24-02-23-21-31-09-085