تۆڵە حسێن
راستەوخۆ دوابەدوای نەخۆش کەوتنی مام جەلال‌و رونتر لەکاتی گفتوگۆکان بۆ بەستنی کۆنگرەی چوارەمی یەکێتیی، لەپلینیۆم‌و تەنانەت لەهەڵبژاردنەکانی رابردووداو ئەو دۆخەی بۆ ئەوکاتە نائاساییەی کە لەناو یەکێتیی نیشتمانیی کوردستان هەبوو، کەناڵەکانی میدیایی‌و بەتایبەتر سۆشیال میدیا، بەمەبەست یان نا، دەستەواژەی "باڵی تاڵەبانی" یان رونتر "ماڵی مام جەلال"یان لەبەرامبەر گروپی تر لەناوەو دەرەوەی یەکێتیی-دا، بەکاردەهێنا. لەم ناولێنانەشدا، هێندەی دەویسترا وێنەی راستەقینەی دۆخەکە بشێوێنرێ، لەپێگە، کاریگەری، لەهەژمون‌و لەکاریزمایی سکرتێری گشتیی یەکێتی کەمبکەنەوە، کەمتر لەوە، بۆ ناساندن‌و پێناسەکردنی رەوشی دۆخی ناو یەکێتیی بوو.
چەند رۆژێکیشە، بەتایبەت کە قسەکردن لەدیاریکردنی کاندیدێک بۆ پۆستی سەرۆک کۆماری عیراق، کە پشکی یەکێتییە، جارێکی تر، ئەو دەستەواژەیە گەرمتر کراوەتەوەو بەسەروبۆری ترەوە، دادەتاشرێ‌‌و لەقاودەدرێ.
مام جەلال، کە لەکۆنگرەکانی یەکێتیدا، هەمیشە لەبەرامبەر زیاتر لە(60) ساڵ، خەبات‌و پێشمەرگە بوون، سیاسەتکردن‌و دیپلۆماسییەت، لەناو بزووتنەوەی سیاسیی کورد-دا بەگشتی‌و یەکێتی بەتایبەتی، لەدەنگدانی ئاشکرا‌و گشتیدا، شەرەفی سکرتێری گشتیی یەکێتی پێدراوە، تا کۆنگرەی چوارەم‌و ئەگەر واوەتریش شەرەفی سەرۆکایەتی یەکێتیی پێبدرێتەوە، بەخشین‌و مەکرەمەی هیچ لایەک، هەڤاڵ‌و ئەندامێک نییە، تا لەپاڵ ئەو دەستەواژەیەدا، هەندێکجار زیادەڕەوی بکات‌و بەویستراوی دۆخ‌و ئەگەرێک، بیکاتە سەرۆکی گروپ‌و باڵێکی دیاریکراو.
بۆیە نەڕەوا بووەو نەدەشبێ، بۆ هیچ لایەک، "مام" هاوتا‌و هاوشانی هەر دیاردەیەکی ویستراو، نەویستراو، خوازراو و نەخوازراوی رێکخراوەیی یەکێتی بکات.
چون، "مام" هەمیشە هاوسەنگەر، هاوخەبات، فیداکارو رابەڕ بووە، خۆی نەخستۆتە هیچ پارادۆکسێکەوە، پێویستی نەبووە، تموحیشی بەهیچ باڵ‌و ماڵێکیش نەبووە، ئەو هەمیشە لەجێگەی خۆی دابووە، نەکەمی کردووەو نەدرەنگ هاتووە، ئەو لەکوێ بووبێ "هەمیشە ئەوێ سەرەوە بووە"، مام مانای بەجێگەو مەکان بەخشیوە، نەک جێگەو مەکان بە"مام جەلال"ی بەخشیبێ..
ئەمڕۆش، کە عیراق شێواوە، ئاییندە تاپۆو بومەلێڵە، رۆشن‌و ناڕۆشنە، جێگەکەی مام لەبەغدا، چاوەڕێی یەکێتییەکی تر دەکا، کە دەبێ "پیاوی دەوڵەت بێ"و وەک رەوایەتێکیش دەبێ شەرعییەتی کوردایەتی لەسەربێ، مێزی گفتوگۆکانی مەکتەبی سیاسی، بۆتەوە مەیدانی جەست‌و جوەکانی ناو مەکتەبی سیاسی یەکێتیی.
پرسیاریش ئەوەیە، یەکێتیی؛ کۆبێتەوە یان نا. بڕیار بدات یان نا. راگەیەندراو هەبێ، یاخود نەبێ. بۆ میدیا لەناوخۆ و لەدەرەوە، ئەمە دەبێ بەهەواڵ‌و مانشێت‌و سەردێڕ.. ئێستا کێبڕکێیە، کێ زوتر نها‌و بەپەلەیەکی لەسەر یەکێتیی دەست دەکەوێ، هەرنەبێ، دادەتاشرێ.. ئایا ئەمە لەسادەترین مانادا، پێگەو سەنگی قورسی یەکێتیی نییە؟ کەواتە یەکێتیی گفتوگۆ دەکات، فاڵ ناگرێتەوە، هەڵپەی پۆست‌و پلە ناکا، نە خێری دەوێ، نە لەماف‌و ئیستحاقاقی خۆشی خۆش دەبێ، چون خاوەن ستراتیژە، رووداوەکان دەخوێنێتەوە، ئەوجا بڕیار دەدا.
ئێستاش، کاتێک ئەم راستییانە، ئەگەر بەمەرام لێڵ نەکرێن، روونتر دەبنەوە، لەسایەی دەستەواژەی داتاشراوی "ماڵی مام جەلال‌و باڵی بەرهەم ساڵح"دا، هەوڵەکانی مەلا بەختیار، وەک پیشەی هەمیشەیی هەندێک، کە "مێژووەکەی بۆ دوورتر لەئێستا دەگەڕێتەوە"، لەچوارچێوە دەگیرێ! بەناوی بەرژەوەندی، بەناوی خەونی دەستبەسەراگرتن، دەکرێ بەمانشێت‌و خوێندنەوەی نالۆژیکی بۆ دەکرێ.
ئەمە لەکاتێکدا، مەلا بەختیار، بەرپرسى دەستەی کارگێڕی یەکێتی، بەهۆکاری پێگەکەی، خەباتەکەی، رابردووەکەی، خاوەن هێزو دەسەڵاتەکەی کە "هەمان هێزو دەسەڵاتی یەکێتییە"، وەک سۆشیال میدیاش راستەوخۆ لەدوای ئەو دۆخە نەخوازراوەی بەهۆی نەخۆش کەوتنی "مام"ەوە هاتە ئاراوە‌و وتارەکانی لەهەفتە یادی (38)ساڵەی یەکێتیی، لەلێدوانی ئاشکرا، لەکۆبوونەوەی نهێنی‌و داخراویشدا، رایگەیاندو سوریشە لەسەری کە "لەپێناو یەکێتیی ناو یەکێتیی، بیر لەزۆری‌و کەمی، لەدەسەڵات‌و پێگە ناکەمەوە، لەمافى منیش با زۆرتر بۆ هەڤاڵان‌و کەمتر بۆ من بێ"، ناوی ناوە "جەنگاوەری ئاشتی"، چونکە رون‌و بێ نهێنییە، بەئاراستەی یەکێتی ناو یەکێتی خەبات دەکا، "نەک پەرتکە‌و زاڵبە".
مەلا بەختیار، کە مێژووەکەی شاهێدێتی، دوای هەر پیلانێک، لەدوای هەر دژایەتییەک، گەلەکۆمەکێیەک، هەرچەندێک بۆ خوارە دایانخزاندبێ، ئەو بەوچانێک، زۆرتر، بەپێش کەوتۆتەوەو چۆتەوە سەرێ. ئێستاش کە دەبێتە داینەمۆی گەرمترکردنی گفتوگۆکان لەناو مەکتەبی سیاسی، بۆ یەکێتیی ناو یەکێتیی، بەخوێندنەوەو بەبیرتیژی، بەلۆژیک‌و بۆ بەرژەوەندی یەکێتیی، هەر بەستراتیژەکەی سکرتێری گشتی، بۆ تۆکمەترکردنی کۆڵەگە‌و پایەکانی یەکێتیی، بێ پسانەوە، بەهەموو مانا جوانەکانەوە، بەپاراستنی مافەکانەوە، هەمووان دەباتەوە ژێر ساباتەکەی "مام جەلال".
چونکە ئێستا لەهەموو سات‌و کاتێ زیاتر، رونتر ئەوە بەهەڵوێست‌و سیاسەتی مەلا بەختیار-دا دیارە، نەک هەر کەم‌و زۆر باوەڕی بەدەست بەسەراگرتنی جومگەکانی حزب-دا نییە، بەڵکو خوێندنەوەو باوەڕی نەگۆڕی وایە، کە قۆناغی بوون بەسکرتێری گشتی‌و خەون بۆ ئەو پلە رێکخراوەیی‌و حزبییە بەسەرچووە. تەنانەت چەندجارێک لەمەجلیسی هەڤاڵانە‌و دۆستانەدا، تێڕوانینی جدی خۆی بۆ ئەو پۆستە بەڕوونی، بێ گرێ‌‌و گۆڵ خستۆتەڕوو، رەتیکردۆتەوە بڕوای بەسکرتێربوون‌و دەستگرتن بەسەر جومگەکانی حزبدا هەبێ. بەپێچەوانەوە رایگەیاندووە، کە لەکۆنگرەی ئاییندەدا، "کۆنگرەی چوارەمی یەکێتی" بەوردی لەوبارەیەوە قسەی خۆی دەبێ‌‌و سووریش دەبێ لەسەر هەڵوێستی نەگۆڕی خۆی، کە ئیتر قۆناغێکى نوێ دەستیپێکردووە، قۆناغی کۆنسەی سەرکردایەتی‌و بڕیار، دەبێ بڕیاری جەماعیی بێ.
کەچی، هەن نەک هەر بەرپێی خۆیشیان نابینن، رمڵ لێئەدەن، سەرسم ئەدەن‌و عاریش نانێن.. لەپاڵ "میدیا"ی بێ ستراتیژیش، کەم بن یان زۆر، لەپاڵ رقێکدا، هی خۆیان یان کەسانێکی تر بێ، لەژێر لێوەوە، کە هیچ سەوز ناکەن، "هەوڵەکانی مەلا بەختیار، سەری سوڕاندون"!.
مەلا بەختیار، کە منیش ئامادەم لەبەرامبەر ئەو هەوڵانەیدا، لێرەوە بە"جەنگاوەری ئاشتی" ناوی بهێنم، هەڵبەت هەوڵەکانی، سیاسەتەکانی، داڕشتنی پلانەکانی‌و دواهەمین هەڵبژاردنەکانیش شاهێدی بەهەقی بۆ دەدات، بەر لەهەرکسێک هەژموون‌و پێگەی "یەکێتیی‌و مام" دەپارێزێ. ناڕازێتی، یان رەواترە بڵێم سەرنجێکی هەر هەڤاڵێکیش لەمەکتەبی سیاسی، لەسەر خودی کاندیدبوونی "بەرهەم ساڵح" هەیە، مەلا بەختیار، لەم پێگەیەوە، بۆ رەواندنەوەی سەرنجەکان، بۆ تێگەیشتن‌و بۆ گەیشتن بەکەناری بڕیاردانی دروست، بەم پرەنسیپە دیموکراتییە، رێگەیەکی گرتۆتەبەر، ئەگەر خۆیشی زیانی لێبکات، ئەوا لەپێناو یەکێتیی ناو یەکێتیی-دا هەر دەیباتە سەر.
ئەو؛ "مەلا بەختیار" کە بە(21)ساڵ تەمەنەوە، سەرکردایەتی حزبەکەی بووە، هەموو ژیانی هەر لەشاخ‌و چەندە لەبەردەم گوللەی دوژمنان‌و دژە دیموکراسییەکاندا بووە، بەهێندەی ئەوەش، لەبەردەم نەشتەری چەند هەڤاڵێکی ئەوکاتی دابووە، هەڵبەت ئەوکات، لەشاخ. ئێستاش هەندێک لەمیدیا کە دەمی لەو پاشماوەی "تەوتەمە" ژەنیوە، ئامانجی بازاڕ گەرمکردنە بۆ ئەو ترسەی هەر ئەوکاتە، لەبوون‌و پێگەی مەلا بەختیار، هەبووە. "ئێ خۆ هیچ کەسێک خێری پێنەکردووە. "
ئێستاش یەکێتیی، لەدرێژەی ئەو وەرچەرخانە نوێیەیدا کە لەدوای هەڵبژاردنی (21/9)ی پارساڵدا، بەستراتیژ، بەئارامی بیری کردەوەو بەقوڵی رەخنەی گرت‌و لە(30/4)دا جێبەجێی کرد، ئاراستەی هێزو پێگەکەی بردە قۆناغێکی پێشکەوتوو ترەوە، ئەوا هەر لەو پێودانگەوە، ئاسان نییە بۆ یەکێتیی نیشتمانیی کوردستان، وەک هێزێکی سیاسی، تەوژمێکی فکریی مۆدێرن، کراوە بەڕووی کۆی ئەو ئەگەرو گۆڕانە گەورانەی کە جیهانی هاوچەرخ لەزۆر بواری ستراتیژی، سیاسی، ئابووریی‌و فەرهەنگیدا بەخۆوەی بینیوە‌و لەبەردەوامیدایە، هاوکات لەڕیزی پێشەوەی ئەو هێزە کوردستانیانەشدا بووە کە بەردەوام بەئاراستەی کۆکردنەوەی پاڵپشتیی نێودەوڵەتی بۆ دۆزی کورد خەباتی کردووە، لەئێستای رۆژهەڵاتی ناوەڕاست، ناوچەکەو عیراق، دەوڵەتانی هەرێمایەتی، بێئەوەی لەگەڵ پێداویستی‌و پێدراوە تازەکانی سیستمی نوێی جیهاندا کارلێک بکاو شێوازی نوێی خەباتی سیاسی‌و فکری، لەپێناو بردنە پێشەوەی زیاتری پرسی خاک‌و نەتەوەیدا مسۆگەر بکا، کاندێک بۆ پۆستێکی باڵا دیاری بکات.
بۆیە ئەوەی مەلا بەختیار‌و هەڤاڵەکانی لەمەکتەبی سیاسی، ئامانجیانە، بەهای زۆر لەوە گەورەتری هەیە، کە هەندێکی کەم لێرەو لەوێ، یان کەناڵێکی میدیای گەرەکێتی.
