جێگری سەرۆكی هەرێم لەگەڵ فەرماندەی هێزەكانی كۆماندۆی كوردستان كۆبووەوە
بەڕێز جێگری سەرۆكی هەرێمی كوردستان سەردانی بارەگای فەرماندەیی هێزەكانی كۆماندۆی كوردستانی كرد و لەلایەن بەڕێز فەرماندەی هێزەكانی كۆماندۆی كوردستان و ژمارەیەك لە فەرماندەكانی كۆماندۆوە بەگەرمی پێشوازی لێكرا.
ئەمڕۆ سێشەممە ١٨ی شوباتی ٢٠٢٥ بەڕێز شێخ جەعفەر شێخ مستەفا، جێگری سەرۆكی هەرێمی كوردستان سەردانی بارەگای فەرماندەیی هێزەكانی كۆماندۆی كوردستان كرد و لە لایەن بەڕێز فەرماندە دیار عومەر، فەرماندەی فەرماندەیی هێزەكانی كۆماندۆی كوردستان و ژمارەیەك لە فەرماندەكانی كۆماندۆوە بەگەرمی پێشوازی لێكرا.
فەرماندەی فەرماندەیی كۆماندۆی كوردستان بە ناوی فەرماندە و كوڕانی كۆماندۆوە بە گەرمی بەخێرهاتنی لە بەڕێز شێخ جەعفەر شێخ مستەفا كرد، هاوكات سەردانەكەی بەڕێزیانی بەپێویست زانی و لەو رووەوە ڕاپۆرتێكی كورتی دەربارەی ئەركەكانی "كوڕانی كۆماندۆ"ی بۆ ساڵی ٢٠٢٥ ی بۆ بەڕێزیان خستەڕوو.
هاوكات لەكۆبوونەوەكەدا،جێگری سەرۆكی هەرێم سوپاس و دەستخۆشی لە فەرماندە و فەرماندەکان و کوڕانی کۆماندۆ کرد و رۆڵ و كاریگەری كوڕانی كۆماندۆی لە ڕووبەڕووبوونەوەكانی داعش و پاراستنی خاكی پیرۆزی كوردستان بەرز نرخاند، باسی لەوەشكرد ئەو رێبازەی كۆماندۆ كاری لەسەر دەكات پیرۆزە و شەهیدی فەرماندە "ئاكام عومەر" لەو پێناوەدا خۆێنی بەخشییە خاك و نیشتمان، بۆ ئێمە كۆماندۆ یادگارە شیرینەكەی "ئاكام عومەر"ە و ئێمەش درێژەپێدەری ئەو رێبازە دەبین.
بەڕێز شێخ جەعفەر شێخ مستەفا، پرسی یەكخستنەوە و چاكسازییەكانی وەزارەتی پێشمەرگە، مەشق و ڕاهێنانەكان و بەرزكردنەوەی ئاستی توانا سەربازییەكانی پێشمەرگە تاوتوێکرا، هەروەها بەردەوامبوونی ئۆپەراسیۆنەكانی هێزی پێشمەرگە و سوپای عێراق و هاوپەیمانان باسی لێوەكرا لەو بارەیەوە رێنوێنی پێویستی دایە فەرماندەكان.
راگەیاندنی فەرماندەیی هێزەكانی كۆماندۆی كوردستان
