كۆمسیۆن وادەی دەستپێكردنی بانگەشەی هەڵبژاردنی بۆ پەرلەمانی كوردستان دیاریكرد
كۆمسیۆنی باڵای سەر بەخۆی هەڵبژاردنەكانی عێراق وادەی دەستپێكردن و كۆتایی هاتنی بانگەشەی هەڵبژاردنی پەرلەمانی كوردستانی دیاریكرد و وتەبێژی كۆمیسیۆنەكەش جەخت دەكاتەوە كە تەنها ئەنجومەنی كۆمیسیاران دەسەڵاتی ئەوەیان هەیە گۆڕانكاری لە وادەی دەستپێكردن و كۆتایی هاتن بکات.
جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بە بواری ڕاگەیاند: بەگوێرەی ئەو خشتەی كارەی كەكۆمسیۆنی باڵای سەر بەخۆی هەڵبژاردنەكان دامانناوە دەستپێكردنی بانگەشەی هەڵبژاردن بۆ بەربژێرانی سەر بەخۆ و هاوپەیمانی لایەنە سیاسییەكان و قەوارە سیاسییەكان لە 10/5/2024 دەستپێدەكات.
ئاماژەی بەوەشكرد، بانگەشەی هەڵبژاردن تا ڕۆژی 5/6/2024 بەردەوامی دەبێت و لە بەرواری 6/6/2024 كۆتایی بە بانگەشەی هەڵبژاردن بۆ كاندیدە سەربەخۆكان و هاوپەیمانی و قەوارە سیاسیەكان دێت.
وتەبێژەكەی كۆمیسۆنی باڵای سەر بەخۆی هەڵبژتردنەكان ئەوەشی خستەڕوو، بڕیاردان لەسەر گۆڕانكاری لە وادەی دەستپیكردنی بانگەشەو كۆتایی هاتنی بانگەشەكردن لەدەستەڵاتی ئەنجومەنی كۆمیسیاراندایە و تەنها ئەوان دەتوانن گۆڕانكاری لەو وادەیەدا بكەن.
