چوارچێوەی هەماهەنگی هەڵوێستی خۆی بەرامبەر کردەوەی سوتاندنی قورئان خستەڕوو بە کارێکی نەرێنی رەتکراوە لە قەڵەمیدا و پشتیوانی تەواوی خۆی بۆ جێبەجێکردنی پڕۆژە یاسای بودجە خزمەتگوزارییەکانی دیکەی حکومەتی عێراق دەربڕی.
ئاماژە بەوەشکراوە، محەمەد شیاع سودانی سەرۆک وەزیرانی عیراق لە کۆبوونەوەکە ئامادەبوو و زانیاری لە بارەی کۆتا نوێکارییە سیاسی و خزمەتگوزارییەکانی عێراقی خستەڕوو و هەموو لایەک کردەوەی سوتاندنی قورئانی بە کارێکی نەرێنی و خراپ لە قەڵەمدا.
ئەوەش خراوەتەڕوو، چوارچێوەی هەماهەنگی هەوڵەکانی حکومەتی عێراق بەرز دەنرخێنێت و پشتیوانی تەواو لە جێبەجێکردنی پڕۆژە یاسای بودجەی ناوەندی و خێراکردن لە هەر هەوڵێک کە خزمەتگوزار بە خەڵکی بگەیەنێت دەکات.
ئەمەش لە دوای ئەوە دێت، پەرلەمانی عێراق بودجەیەکی خاوەن قەبارەی ١٥٣ ملیار دۆلاری لە رێکەوتی ١٢ی حوزەیران بۆ ساڵەکانی ٢٠٢٣ و ٢٠٢٤ و ٢٠٢٥ پەسەندکرد.
بودجەی ئەمجارەی عێراق خەرجییەکی بەرچاوی بۆ پڕۆژەکانی گەشەپێدان و ژێرخانی ئابوری و پلانی زیادکردنی دەیان هەزار کارمەند لە کەرتی گشتی لەخۆگرتووە، رەشنووسی بودجەکە دوای چەند مانگێک لە ململانێی سیاسی تێپەرێندرا و زۆربەی گفتوگۆکان لە بارەی داهاتی نەوت بوو لە نێوان حکومەتی هەرێم و بەغدا.
لە ساڵی ٢٠٢١ قەبارەی پڕۆژە یاسای بودجە ٨٩ ملیار دۆلاربوو و لە ساڵی ٢٠٢٢ بەهۆی ناسەقامگیری سیاسییەوە پڕۆژە یاسای بودجە ئامادەنەکرا و حکومەتی ئەو سەردەمە تەنها یاسایەکی بەپەلەی بۆ دابینکردنی خەرجی و شایستەداراییەکان ئامادەکرد.
لە پڕۆژە یاسای بودجە نرخی نەوت بە ٧٠ دۆلار هەژمارکراوە و هەناردەی نەوتیش بە ٣.٥ ملیۆن بەرمیل خەمڵێندراوە و لە ناویدا ٤٠٠ هەزار بەرمیل لە نەوتی هەرێمەوە بەرهەمدێت و لە بەرامبەردا ١٢.٦٪ بودجە وەک پشکی هەرێمی کوردستان دیاریکراوە.
