سەرچاوەیەکی ھێزی پێشمەرگە ئاشکرایدەکات، ئەو ھاوکارییە سەربازیانەی ئەمریکا بڕیاریدابوو بیگەیەنێتە پێشمەرگە، ئێستا لەھەرێمی کوردستانە، باڵیۆزی پێشووی ئەمریکاش لەکرواتیا کە ئێستا ڕاوێژکاری سەرۆکی ھەرێمە، ئاشکرایدەکات لەم ھەفتەیەدا ئەمریکا ھەموو چەکە قورسەکان ڕادەستی کورد دەکات بۆئەوەی لەبەرامبەر داعش بەکاریبێنێت.چەکەکان گەیشتنبەگوێرەی سەرچاوەکانی ھەواڵ، دوای ئەوەی ئەمریکا بڕیاریدا لەڕێگەی چەک و کەرەستەی سەربازییەوە ھاوکاری ھێزەکانی پێشمەرگە بکات، ئێوارەی ئەمڕۆ سەرجەم ئەو چەکانە، لەڕێگەی فڕۆکەخانەی نێودەوڵەتی ھەولێرەوە گەیشتوونەتە ھەرێمی کوردستان.
سەبارەت بەجۆری ئەو چەکانەو لایەنی بەرپرس لەبەڕێوەبردنی پرۆسەی ناردنی ئەو چەکانە، چەند سەرچاوەیەکی ھەواڵ ئاماژەیان بەوەکردووە، ئەو پرۆسەیە بەسەرکردایەتی وەزارەتی بەرگی ئەمریکا (پینتاگۆن) نەکراوە، بەڵکو پێدەچێت ئاژانسی ھەواڵگریی ئەمریکا (سی ئای ئەی) سەرپەرشتی بکات.
ھەڵگورد حیکمەت بەڕێوەبەری گشتیی ڕاگەیاندن و ھۆشیاریی نیشتمانی لەوەزارەتی پێشمەرگە، لەلێدوانێکدا بۆ سایته‌كان ھەواڵەکەی پشتڕاستکردەوەو وتی:"سەرەتای بەڵێنەکەی عیراق و ئەمریکا جێبەجێکرا".
وتیشی:"ئێوارەی ئەمڕۆ یەکەم وەجبەی چەکی ئەمریکا گەیشتە ھەرێمی کوردستان و بەردەوامیش دەبێت".
لەبارەی جۆرو بڕی چەکەکەشەوە، ھەڵگورد حیکمەت وتی:" لەوبارەیەوە ھیچ زانیارییەک بۆ میدیاکان ئاشکرا ناکەین، تەنھا ئەوەندەتان پێدەڵێین بڕی وەجبەی یەکەمی چەکەکانی ئەمریکا گەیشتە ھەرێمی کوردستان".
ئەمریکا لەڕابردوودا پێداگری لەسەر ئەوەکردووە کە تەنھا لەڕێگەی بەغداوە ھاوکاری سەربازی پێشمەرگە دەکات، بەڵام ئەمجارەیان سیاسەتی ئەو وڵاتە گۆڕاوەو ڕاستەوخۆ ئەو چەکانە بۆ کوردستان دەنێرێت، بەڵام جۆری چەکەکان ھێشتا ئاشکرانەکراون.
گالبرێس ئاشکرایدەکاتپیتەر گالبرێس باڵیۆزی پێشووی ئەمریکا لەکرواتیاو ڕاوێژکاری سەرۆکی ھەرێمی کوردستان، ئاماژەی بەوەداوە، وڵاتەکەی لەم ھەفتەیەدا چەکە قورسەکان ڕادەستی کورد دەکات بۆ ئەوەی لەڕووبەڕووبونەوەیان دژی تیرۆریستانی داعش بەکاریبێنن.
گالبرێس بۆ ماڵپەڕی (BBC) ئاشکرایکردووە، ئەمریکا دەیەوێت بەمەبەستی پشتیوانی لەکورد، ھێرشە ئاسمانییەکانی بەردەوام بن، وتوشیەتی:"جگە لە ٥٠ فەرمانبەر، ھاوکات ژمارەیەکی نادیار لەھێزە سەربازییەکانی خۆی لەھەولێر ھاوکاری پێشمەرگە دەکەن لەدژی داعش".
ئاماژەکردن بەبوونی ھێزی سەربازی ئەمریکی لەھەرێم لەکاتێکدایە، پێشتر جەبار یاوەر ئەمینداری گشتی وەزارەتی پێشمەرگە ڕایگەیاندبوو، تەنھا چەند پسپۆڕێکی سەربازی ئەمریکی لەکوردستانن، ئەویش بۆ چاودێریکردنی جوڵەی تیرۆریستانە.
یاوەر ئەوەشی وتبوو، ئەمریکا پێشتر ڕێگری لە پڕچەککردنی ھێزی پێشمەرگە دەکرد، لەبەرئەوەی حکومەتی نوری مالێکی لەبەغدا دژایەتی ئەو پرسەی کردووە، بەڵام وەک گالبرێس وتویەتی:"ئێستا ئەو بابەتە گۆڕانی بەسەرداھاتووەو چەکی ئەمریکییەکان دەگاتە دەستی پێشمەرگە".
ڕاوێژکارەکەی سەرۆکی ھەرێم باسی لەچەکەکانی پێشمەرگەو تیرۆریستانی داعش کردووە، لەو ڕووەشەوە داعشی بە پڕچەکتر زانیوە، بەوپێیەی ھەرچی چەکی ئەمریکا ھەبوو کە لەدوای کشانەوەی ڕادەستی عیراقی کرد، ئێستا لەدەستی داعشدایە، "بەڵام پێشمەرگە ئەو چەکانەی پێ نییە".
کردنەوەی بنکەی سەربازیئەندامێکی ڕەوتی چاکسازی عێراق ئاشکرایکردووە، ھێرشە ئاسمانییەکانی ئەمریکا بۆسەر مۆڵگەکانی داعش لەھەرێمی کوردستان بەردەوام دەبێت و دوای کۆتاییھاتنی بۆردومانەکان و ڕاوەدوونانی داعش لەکوردستان و عیراق بەگشتی، ئەمریکا بنکەی سەربازی لەعیراق دەکاتەوە.
تۆفیق کەعبی بە ڕاگەیاندنەکانی عیراقی وتووە:" لەنێوان بەغداو ئەمریکا ڕێکەوتننامەی ئەمنی ھەیەو ھێرشی ئاسمانی فڕۆکەکانی ئەمریکاش بۆسەر مۆڵگەکانی داعش لەکوردستان ھەر لەچوارچێوەی ڕێککەوتنە ئەمنییەکاندا ئەنجامدراوە".
بەغداو ھەولێریش ڕێکەوتنی سەربازییان ھەیەپەرلەمانتارێکی کورد لەئەنجومەنی نوێنەرانی عیراق ڕایگەیاندووە، ھەولێرو بەغدا ڕێکەوتننامەی سەربازییان ھەیە بۆ پڕچەککردنی ھێزەکانی پێشمەرگە.
ئەمین بەکر پەرلەمانتاری کورد لەبەغدا بەماڵپەڕی (عین العراق نیوز)ی ڕاگەیاندووە، لەمدواییانەدا حکومەتی عێراق و حکومەتی ھەرێمی کوردستان، ڕێککەوتن بۆ پڕچەککردنی ھێزی پێشمەرگە بەچەکی جۆراوجۆر.
پێشتریش بابەکر زێباری سوپاسالاری عیراق ئاشکرایکردبوو، ئەوان ژمارەیەک چەکی جۆراوجۆریان گەیاندۆتە ھێزەکانی پێشمەرگەو لەئێستاشدا جۆرێک لەھاوکاری لەنێوان ھەولێرو بەغدادا ھەیە.
ھاوکاریکردنی بەغدا بۆ ھێزەکانی پێشمەرگە لەکاتێکدایە، لەساڵی ٢٠٠٥ەوە تائێستا، ھیچ جۆرە چەک و کەرەستەیەکی سەربازی نەداوە بەحکومەتی ھەرێم.
ھەرێم داوای ھاوکاریی کردبەرپرسێکی باڵای حکومەتی ھەرێمی کوردستان داوای لەئەمریکاو ناتۆ کرد چەک و کەرەستەی سەربازی ڕادەستی ھێزەکانی پێشمەرگە لەھەرێمی کوردستان بکەن، بەڵام جگە لەئەمریکا، کەسی تر وەڵامی ئەو داوایەی نەداوەتەوە.
فەلاح مستەفا بەرپرسی فەرمانگەی پەیوەندییەکانی دەرەوەی حکومەتی ھەرێم بەکەناڵی (CNN)ی وتووە:" ھەموو وڵاتانی جیھان ئێمەیان لە بەرەنگاربوونەوە لەگەڵ داعش بەتەنھا جێھێشتووە، دەبێ چەک و ئامێری سەربازیمان پێبدەن تاوەکو بتوانین لەبەرامبەر داعش بوەستین".
دوای داواکارییەکەی ھەرێمی کوردستان، ئەمریکا ھاتەدەنگ و لەئێستادا لەڕێگەی فڕۆکە سەربازییەکانیەوە مۆڵگەکانی داعش بۆردومان دەکات، بەڵام ناتۆ تائێستا وەڵامی نەداوەتەوەو یەکێتی ئەوروپاش بێدەنگە لەئاست ھاوکاریکردنی ھەرێمی کوردستان.
بەگوێرەی سەرچاوەکانی ھەواڵ، ھێزەکانی پێشمەرگە بۆ بەرەنگاربوونەوەی گروپی تیرۆریستیی داعش، چەکی کۆنی ڕوسیای پێیە، بەڵام وەک گالبرێس وتوویەتی:"داعش چەکە ھەرە پێشکەوتووەکانی ئەمریکای پێیە".
ھۆکاری پشتیوانیەکانی ئەمریکا بۆ پێشمەرگە بزانەژمارەیەک لەدیپلۆمات و شرۆڤەکارانی سیاسی، ھۆکاری بۆردومانکردنی مۆڵگەکانی داعش لەلایەن ئەمریکا بۆ پشتیوانیکردنی کورد، دەگەڕێننەوە بۆ مەترسییەکانی ئەمریکا لەکاتی شکستی پێشمەرگەدا.
دوای ھێرشی داعش بۆسەر چەند شارێکی کوردنشینی عێراق و کشانەوەی ھێزی پێشمەرگە، ئەمریکا بۆ یەکەمجار لەقەیرانی ئەمدواییەی عێراق، بەشێوەی ڕاستەوخۆ دەستێوەردانی ڕووداوەکانی کردو تائێستاش چەندینجار بۆردومانی مۆڵگەکانی داعشی کردووە.
باراک ئۆبامای سەرۆکی ئەمریکاش لەلێدوانێکیدا، ھۆکاری ئەو ھێرشە ئاسمانییەی بۆ سەر داعش گەڕاندۆتەوە بۆ ڕێگرتن لەچوونی داعش بۆ شاری ھەولێر.
دیپلۆماتکارانی ڕۆژئاواییش وێڕای ئاماژە بەبوونی ژمارەیەکی زۆری کارمەندانی کونسوڵخانەی ئەمریکا لەھەولێر ڕایاگەیاندووە، ھۆکاری ھێرشە ئاسمانییەکەی ئەمریکا ئاشکرایە، چونکە کاتێک ھێزی پێشمەرگە ڕووبەڕووی داعش دەبێتەوە، ئەوا پێویستییان بە یارمەتییە.
ئەفزەڵ ئەشرەف کە توێژەرە لە ئەنستیتۆی لەندەن وتویەتی:"پێشمەرگە ھێزێکی گەورەیە، بەڵام وەک پێویست چەک و کەرەستەی سەربازییان پێنییەو مەشق و ڕاھێنانی سەربازیشیان وەکو پێویست پێنەکراوە".
دامەزراوەی IHS بۆ لێکدانەوەو تاوتوێکردنی پرسە سەربازی و ئەمنییەکان لەڕاپۆرتێکدا ئاماژەی بەوەداوە، پێدەچێت ئەمریکا بەرەوپێشچوونی داعش بەرەو ھەرێمی کوردستان، بەھێڵی سووری خۆی بزانێت، چونکە بەو شێوەیە داعش دەبێتە ھەڕەشەیەک بۆسەر سەرمایەدارەکانی ئەمریکا لەھەرێم و مەترسیش دروستدەکات.
