بە مەبەستی ئیدانەكردنی هێرشه‌كانی ئیسرائیل بۆسه‌ر كه‌رتی غەزه، له شاری ئیستانبوڵ خۆپیشاندان ساز كرا و هێرش كراییە سەر باڵیۆزخانەی ئیسرائیل.
بە پێی هەواڵێكی ئاژانسی(ئەنادۆڵ)كاتێك له‌به‌رده‌م بینای باڵیۆزخانه‌ی ئیسرائیل له ناوچه‌ی له‌ڤه‌نتی شاری ئیستانبوڵ خۆپیشاندانیكی جه‌ماوه‌ریان ساز كرد، چه‌ند كه‌سێك به دیواری بالیۆزخانه‌كه‌دا هه‌ڵگه‌ڕان و چوونه باخچه‌ی بیناكه‌وه.
خۆپیشانده‌ران به به‌رد و دار شوشه‌ی په‌نجه‌ره‌ی بیناكه‌یان شكاند، له به‌رامبه‌ردا هێزه‌كانی پۆلیس به به‌كارهینانی گازی فرمێسكرێژ و ئاو ڕووبه‌ڕووی خۆپیشانده‌ران بوونه‌وه.
پاش كه‌مێك له بڵاوه‌پێكردنیان، جاریكی دیكه خۆپیشانده‌ران له‌به‌رده‌م بینای بالیۆزخانه‌ی ئیسرائیل كۆبوونه‌وه.
له‌لایه‌كی دیكه ئه‌حمه‌د داودئۆغڵو وه‌زیری ده‌ره‌وه‌ی توركیا به رێگه‌ی ته‌له‌فۆن په‌یوه‌ندی به وه‌زیری ده‌ره‌وه‌ی ئه‌مریكا جۆن كیری كرد و داوای لێكرد به‌زووترین كات هێرشی زه‌مینی ئیسرائیل بۆ سه‌ر كه‌رتی غه‌زه بوه‌ستێنرێت.
