له رۆژانی رابردوو پڕۆژه‌یاسایه‌كمان پێشكه‌شكرد به سه‌رۆكایه‌تی په‌رله‌مان به ناوی پڕۆژه‌یاسای بودجه‌ی حزبه‌كان، به مه‌به‌ستی رێكخستنی پێدانی بودجه‌ی حزبه‌كانی هه‌رێمی كوردستان به شێوه‌یه‌كی دادپه‌روه‌رانه كه ته‌مه‌نی خه‌بات و قوربانیدان و به‌شداریكردنی په‌رله‌مانی بۆ سه‌رجه‌م حزبه‌كان به‌هه‌ند وه‌ربگرێت و ته‌نانه‌ت ئه‌و حزبانه‌ش له‌بیر نه‌كات كه له خولی چواره‌م كورسی په‌رله‌مانیان به‌ده‌ستنه‌هێناوه، بۆیه پڕۆژه‌یاساكه ده‌خه‌مه به‌رده‌م خوێنه‌رانی به‌ڕێزی رۆژنامه‌ی كوردستانی نوێ، به مه‌به‌ستی وه‌رگرتنی راوبۆچوونی سه‌رجه‌م لایه‌نه په‌یوه‌ندیداره‌كان، بۆ ئه‌وه‌ی پڕۆژه‌یاساكه به شێوه‌یه‌ك پهسهندبكرێت، كه دادپه‌روه‌رانه بێت.مادده‌ی یه‌كه‌م:
ئه‌نجومه‌نی وه‌زیران بودجه‌یه‌كی ساڵانه بۆ حزبه سیاسییه مۆڵه‌ت دراوه‌كان له كوردستاندا له‌ناو بودجه‌ی گشتیدا دابینده‌كات، كه بریتییه له (1%)ی كۆی بودجه‌ی گشتی.
هاوكات مادده‌ی دووه‌م به‌مشێوه‌یه هه‌مواربكرێته‌وه:
مادده‌ی دووه‌م:
ئه‌و بودجه‌یه‌ی بۆ حزبه سیاسییه‌كان ته‌رخانده‌كرێت، به‌پێی پێوه‌ری خاڵبه‌ندی ده‌بێت‌و به‌مشێوه‌یه‌ی لای خواره‌وه:
1- به‌ده‌ستهێنانی كورسی په‌رله‌مانی خاڵ وه‌ربگرێت.
2- به‌شداریكردنی هه‌ر حزبێك له خوله‌كانی پێشووی په‌رله‌مان خاڵ وه‌ربگرێت.
3- ساڵانی ته‌مه‌نی هه‌ر حزبێك خاڵ وه‌ربگرێت.
4- به‌ده‌ستهێنانی ژماره‌ی ده‌نگه‌كانی به تێكڕا له سێ هه‌ڵبژاردنی پێشوو خاڵ وه‌ربگرێت.
5- ئه‌و حزبانه‌ی به لیستێك به‌شداریان كردووه، له دوایین هه‌ڵبژاردن به‌پێی رێژه‌ی به‌شدارییان له‌و لیسته‌دا خاڵ وه‌ربگرێت.
6- ئه‌و حزبه‌ی له دوایین هه‌ڵبژاردن به‌شداری كردبێت و كورسی په‌رله‌مانی به‌ده‌ست نه‌هێنابێت، (50%)ی ئه‌و بودجه‌یه‌ی بۆ خه‌رجبكرێت، كه به‌پێی ئه‌م یاسایه ئه‌ژماربكرێت.
7- ئه‌و حزبانه‌ی كه كورسی كۆتایان به‌ده‌ستهێناوه، (75%)ی كه‌مترین به‌شی دیاریكراو بۆ حزبه‌كانی به‌شداری په‌رله‌مانی بۆ خه‌رجبكرێت.
مادده‌ی سێیه‌م: زیادبكرێت بۆ پڕۆژه‌یاساكه‌و به‌مشێوه‌یه بێت:
مادده‌ی سێیه‌م:
ساڵانه به‌شی هه‌ر حزبێك له‌م بودجه‌یه به‌مشیوه‌یه ئه‌ژمارده‌كرێت:
1- خاڵه‌كانی (1,2,3,4,5,6,7) له مادده‌ی دووه‌می ئه‌م پڕۆژه‌یاسایه‌دا كۆده‌كرێته‌وه بۆ هه‌ر حزبێك.
2- كۆی بودجه‌ی ساڵانه‌ی ته‌رخانكراو بۆ حزبه‌كان دابه‌شده‌كرێت به‌سه‌ر كۆی خاڵه‌كانی سه‌رجه‌م حزبه‌كان بۆ دۆزینه‌ی ژماره‌ی پێوانه‌یی (به‌های هه‌ر خاڵێك به پاره ده‌كاته چه‌ند).
3- به‌شی هه‌ر حزبێك له بودجه‌كه بریتییه له لێكدانی خاڵه‌كانی ئه‌و حزبه به ژماره‌ی پێوانه‌یی (به‌های یه‌ك خاڵ به‌پاره).
مادده‌ی سێیه‌می پڕۆژه‌كه ده‌بێته مادده‌ی چواره‌م و وه‌ك خۆی ده‌مێنێته‌وه به‌مشێوه‌یه:
مادده‌ی چواره‌م:
بودجه‌ی ساڵانه‌ی ئه‌و حزبانه‌ی ئه‌م یاسایه ده‌یانگرێته‌وه راده‌گیرێ له حاڵه‌تی هه‌ڵوه‌شاندنه‌وه یان سه‌رپێچی كردن له حوكمه‌كانی یاسای ژماره (17)ی ساڵی 1993ی هه‌مواركراوی حزبه‌كان.
مادده‌ی پێنجه‌م:
به‌خششی دارایی حزبه‌كان به‌پێی سیستمی ژمێریاری به‌كارهاتوو له كوردستانداو له‌لایه‌ن دیوانی چاودێری داراییه‌وه وردبینی بۆ خه‌رجییه‌كانیان بكرێت.
مادده‌ی شه‌شه‌م:
ئه‌نجومه‌نی وه‌زیران و لایه‌نه په‌یوه‌ندیداره‌كان ئه‌م یاسایه جێبه‌جێده‌كه‌ن.
مادده‌ی حه‌وته‌م:
كار به‌هیچ ده‌قیك ناكرێت پێچه‌وانه‌ی حوكمه‌كانی ئه‌م یاسایه بێت.
مادده‌ی هه‌شته‌م:
ئه‌م یاسایه له رۆژی بڵاوكردنه‌وه‌ی له رۆژنامه‌ی فه‌رمی وه‌قائعی كوردستان كاری پێده‌كرێت.
هۆیه‌كانی ده‌رچوواندن:
به مه‌به‌ستی پشتگیریكردنی حزبه سیاسییه‌كانی كوردستان و به‌شداریكردنی چالاكیان له پڕۆسه‌ی سیاسی و به‌رقه‌راركردنی دیموكراسی و فره‌یی حزبی و هاوكاریكردنی دارایی ئه‌م حزبانه به شێوه‌یه‌كی دادپه‌روه‌رانه‌و به‌هه‌ند وه‌رگرتنی خه‌بات‌و به‌شدارییان له په‌رله‌مان و چالاكی سیاسییدا ئه‌م یاسایه ده‌رچوێندرا.
د.عیزه‌ت سابیر ئیسماعیل
ئه‌ندامی په‌رله‌مانی كوردستان
له كوردستانی نوێ-ـه‌وه وه‌رگیراوه
