من و ئیمان
ئەقڵتان بۆ ئەملاولا نەڕوات، مەبەستم لە ئیمان و ئیمانداری و پێنج فەرزەكەی ئیسلام نیە، بەڵكو مەبەستم لە خاتوو ئیمان دەرباس ـ ە كە پێشكەشكارە لە كەناڵی ئاسمانی K24.. لە رۆژی 19 ی نیسان، ئەم خاتوونە دیدارێكی لەگەڵ بەرێز فازڵ میرانی (بەرپرسی دەستەی كارگێڕی مەكتەبی سیاسی پارتی دیموكراتی كوردستان) سازدا، لەم گۆشەیەدا باس لە ناوەڕۆكی دیدارەكە ناكەم، بەڵام كاك فازل وەك سیاسەتوانێكی شارەزا بە شارەزایی دەیان ساڵەی، خۆی لە چەند تەڵەیەكی میدیایی پێشكەشكار لادا، تا كار گەیشتە ئەوەی سیاسەتمەدار ئامۆژگاری میدیاكار بكات بەوەی تۆ بە كاردانەوە (انفعال) ئیش دەكەیت.
ئەو بەراوردەی دەمەوێت لێرەدا بۆ ئێوەی باس بكەم پەیوەستە بە دوو حاڵەتی لێكچووی من و خاتوو ئیمان، زمانی میدیاكار و شێوازی دەربڕینی پرسیار و پابەندبوون بە پرۆتۆكۆڵ و ئەتەكێتی ناوبردن و ناوهێنان، هەموو میدیاكارێك دەزانێت كە پێشكەشكاری سەركەوتوو دەبێتە بەشێك لە ئامێری گەیاندن و هەموو هەست و نەستی خۆی وەلا دەنێت و وەك رۆژنامەنووسێك گەر ناوی هەر كەسێك بهێنێت لەبەر رێزی بینەران و ناوو ناوبانگی كەناڵەكە، پێشگرێك یان پاشگرێك یان نازناوێك یان پۆستێك یان وەك ئەوەی لەدنیادا باوە و هەیە، وشەی (بەرێز) یان (كاك) لە دیالێكتی سۆرانی، وشەی (سەیدا، هێژا، رێزدار....) لە كرمانجی ژوروو بەكاردێن، بەڵام كە خاتوو ئیمان چەند جارێك وتی (بافڵ) بەبێ دانانی هیچ وشەیەكی ئەتەكێتی میدیا، تەنانەت (كاك ـ بەرێز ـ رێزدار ـ هێژا...هتد) كە ئەمانە (پێشگرناوی ناو میدیان)، هیچ لەم وشانەی بەكارنەهێنا، من دڵنیابووم و گومانم نەبوو كەK24 رۆژی داهاتوو پۆزش یان رونكردنەوەی رەسمی یان داوای لێبوردن لە سەرۆكی یەكێتیی نیشتمانیی كوردستان و ئەندامانی ئەو حزبە دەكات، چونكە حاڵەتێكی لەمجۆرە لە مانگی 8 ی ساڵی 2022 لە كەناڵی رەسمی یەكێتی روویدا، هەرچەندە هەرگیز وەك ئەوەی خاتوو ئيمان زەق و كراوە و ناشیرین نەبوو، بەڵام چی روویدا؟ ئەوكاتە من لێپرسراوی كەناڵەكە بووم و تەمەنی خزمەتی یەكێتی بوونیشم 40 ساڵ بوو، خزمەتی ناو میدیای حزبەكەشم 30 ساڵ بوو، خۆشم 56 ساڵ تەمەنم بوو.
لەسەر ئەم رستەیە (سەرۆك بافڵ تاڵەبانی و مەسعود بارزانی) لەبەرئەوەی تەنها نازناو دانرابوو، وشەی سەرۆك لەبەردەم ناوی كاك مەسعود دانەنرابوو، سەرۆك بافڵ بە فرمانی خۆی جارێ ئێمەی كارەبا كرد و ئەم سزایەش تەنها لەسەر من وەك سەرنووسەر و بەرپرسی سایتی رەسمی نەوەستا، بەڵكو بۆ ماوەی یەك مانگیش كەناڵەكەی داخست.
جا بنواڕنە ئەم جیاوازیە لە ئەتەكێتی زمان و داڕشتنی تایتڵ (ناونیشان)، تەنها وشەی سەرۆك بۆ جەنابی كاك مەسعود دانەنرابوو نازناوی بارزانی دانرابوو لانەدرابوو، بەپێی هەندێك بۆچوونی زمانەوانیش وترا كە وشەی سەرۆك لەو رستەدا بۆ هەردوو كەسایەتیەكە دەبێت.
گرنگ لەم بەراوردەدا ئەوەیە كە ئیمان دەرباس و K24 كەسیان سزا نەدران، دیارە من هەڵە بووم لەچاوەڕوانیەكەمدا، وامدەزانی بیركردنەوەی میدیایی و پرۆتۆكۆلی ناوهێنان لای هەموو كەناڵەكان وەك یەكە، بۆیە ئێستاش هیوادارم و داواكارم میدیاكانی یەكێتی هەر بەڕێزەوە بەو زمانەی كە فێركراون، بەو ئەتەكێت و جوانیەی كە پێی ناسراون بەردەوام بن، ئەگەر ناوی سەرۆكی یەكێتیش بە ناوی تاقو تەنهای خۆی بوترێت، ئێوە لە ریتمی قوتابخانەی زمانەوانی خۆتان لامەدەن و نازناوی هیچ بەرپرس و سەرۆكێك دەستكاری مەكەن، چونكە میدیاش پرۆتۆكۆڵی زمان و ئەتەكێتی ناوبردن و ئاخاوتنی لێدابماڵیت، دەبێتە میدیای (فاڵتۆ).
ئەمەش لە سێگۆشەی خڕ دەچێت.
كاروان ئەنوەر
