محەمەد ڕەئووف درەو میدیا
كاك ئاوات خاڵەشەهابت لە یادە؟
دەڵێن خاڵە شەهاب لە هاوڕێكانی توڕە دەبوو كە دەیانویست پێشی بكەون بۆ بەردەم پەتی سێدارە، ئەو "گوللە دەیبێژاو ئەی ڕەقیبی بۆ دەوتن" ئەو دەیوت "شەهید دەبین لە پێناو كەرامەت و شكۆ و ئیرادەی گەلەكەمان"، خاڵەشەهاب دەكاتە مامی كاك ئاواتی شێخ جەناب وەزیری دارایی حكومەتی هەرێمی كوردستان (دوێنێ هاوڕێكانی خاڵە شەهاب وتیان ئەگەر كێشەی موچە چارەسەر نەبێت دەچینە سەر فەرمانگەكانی حكومەت و وەك راپەڕینەكە رایاندەماڵین)
ئێستا بەبەرچاوی كاك ئاواتی شێخ جەناب و بەدەستی حكومەتێك كە ئەوو برادەرەكانی تیایدا بەشدارەو خۆیشی خەزنەدارو پیاوی پارەكەی حكومەتە، كەرامەت و ئیرادەو شكۆی (ملیۆنێك و 200 هەزار) موچەخۆری كورد زیاتر لە (10) ساڵە شكێندراووەو دەشكێندرێت، ئێوە نە قسەیەكتان هەیە؟، نە هەڵوێستێك؟، نە بۆچۆنێك؟ نە پێشی هاوڕێكانیشیتان دەكەون بۆ بەردەم پەتی سێدارە، ئەزعەفولئیمانیش (دەستلەكاركێشانەوە).
ئەزانین بەرپرسیاری یەكەم لەم دۆخە پارتی و یەكێتیی و وەزیرو سەرۆك و جێگرو بەرپرسانی ئەوانە، بەڵام ئێوەو ئەو چوارپێنج وەزیرە، لە ماوەی شەش ساڵی رابردوو یەك هەڵوێستی روون و راشكاومان لێنەبینین لە پێناو خەڵكدا، یەك قسەمان نەبینی لە پێناو شەفافییەتدا ئەو هەموو دزی گەندەڵی و قاچاغی و ستەمە، ئێستا ئێوەش (هەرچوار وەزیرەكە) بەشێكن لە ستەمی دواكەوتنی موچە، بەشێكن لە شكاندنی شكۆ و كەرامەتی موچەخۆران، بەشێكن لە بێڕێزیكردن بە تاكی كورد.
جەنابی وەزیری دارایی كاك ئاواتی شێخ جەناب:
- تا ئێستا (18) موچە نەدراوە بە كاملی (13) موچەی تەواوەتی هی كابینەی نۆیەمە و كە ئێوە بەشدارن تیایدا.
- 44 موچە پاشەكەوت كراوەو لێیبڕاوە بەشێكی هی كابیەنی نۆیەمەكە ئێوە بەشدارن تیایدا.
- كۆی گشتی بە بێ پلە بەرزكردنەوە (23) ترلیۆن دیناری موچەخۆران قەرزارن كە (13) تلیۆن دیناری هی كابینەی نۆیەمەكە ئێوە بەشدارن تیایدا.
جەنابی وەزیری دارایی بەڕێز...
- زیاتر لە (10) رۆژە (761) ملیار دینار لە بەغدادەوە هاتووە.
- خۆتان ووتان داهاتی ناوخۆ مانگانە (320) ملیار دینارە، واتا داهاتی دوو مانگی داهاتی ناوخۆ لەبەردەستە هەرچەندێكی مابێت بەشی تەواوكاری موچە دەكات.
- رۆژانە (300) هەزار بەرمیل نەوت بەرهەمدەهێندرێت بەرمیلی بە (35 -40) دۆلار دەفرۆشرێت، ئێوە دەزانن داهاتەكەی چی لێدێت؟.
ئێستا پرسیارەكە ئەوەیە ئەگەر دەسەڵاتان هەیە بۆچی موچە دابەشناكەن، یان ئەزعەفولئیمان قسەیەك ناكەن، كە ئێوە خەزنەداری ئەم حكومەتەن.
ئەگەر دەسەڵاتیشتان نیە، بۆچی لە پێناو شكۆی خۆتان لە پێناو ناوو ناوبانگ و مێژووی خۆتان دەستلەكارناكێشنەوە ئێوە دەیان ساڵ پێشمەرگە نەبوون؟ مەگەر لە پێناو شكۆو كەرامەتی كورد نەبوو؟، دواتر ئێوە دێنەوە بەردەمی خەڵكی چی وەڵامی خەڵكی دەدەنەوە؟، چی بە هاوڕێكانی خاڵە شەهاب دەڵێن كە ئێستا دەڵێن چەك هەڵدەگرینەوە دژی ئەم حكومەتە؟.
ئێستا ئێوەو وێژانی خۆتان لە كۆی ( ملیۆنێك و 200 هەزار) موچەخۆر دڵینیام یەك موچەخۆرتان دەستناكەوێت لێتان رازی بێت، هەموو هەست دەكات شكۆ و كەرامەتی شكێندراوە لەلایەن حكومەتێكەوە كە ئێوە تیایدا بەشدارن و خەزنەدارن، ئێستا بۆ موچە خۆرێك موچەكەی نیشتمانیەتی، كەرامەتیەتی، شكۆیەتی، لە ئێستادا بۆ موچەخۆرێك هیچ شتێك لە موچەكەی پیرۆزتر نیە، هیچ هەواڵێك لە هەواڵی هاتنی موچەكەی گرنگتر نیە، باسی شۆڕش و نیشتمان و بارودۆخی ناسك و ئەوشتانە بۆ كەس مەكەن.
بەرێز كاك ئاوات بۆ من گرنگ نیە خەتای بەغدادە یان هەرێم، خەتای تەیف سامیە یان سودانی، خەتای هەژماری منە یان تەوتین ، ئێستا خەڵك موچەی دەوێت لە حكومەتی هەرێم، ئێستا تەنیا قسەیەك بكەن ئێوە وەزیری دارایین ئەوە چیە روودەدات بۆ وا لە موچەخۆران دەكەن ؟
ئەویش شیعرێكی شێخ نوری شێخ ساڵح باپیری كاك ئاواتی شێخ جەناب لەسەر دیناری مووەزەف:
هێند عاجزی قەرزارییە، هەر گەییە سەری مانگ
كافر بێ بەجەستەی دڵی غەمباری مووەزەف
یاڕەبی ئەوەی دوژمنە بەم میللەت و خاكە
بێ حورمەتی كەی، هەروەكو دیناری مووەزەف
مەئمور وەكو (شێخ هۆمەر) و وەزعیش وەكو مار
خۆڕایی نییە, ناڵەو هاواری مووەزەی
ناكا بەشی قاوەڵتیی رۆژێكی من ئەمساڵ
سەد خۆزگە بە دینارێكی پێراری مووەزەف
محەمەد ڕەئووف درەو میدیا
