دەزگای ئاسایشی هەرێم لەماوەی كەمتر لە 15 كاتژمێر بكوژی هاوڵاتییەكەی ناحیەی (خدران)ی دەستگیركرد.
لە راگەیەندراوەكەی دەزگای ئاسایشی هەرێمدا هاتووە، شەوی ڕابردوو كاتژمێر ٩ ی شەو، لە(گوندی كانی سپان)ی ناحیەی خدران، هاوڵاتییەك بەهۆی دروستبوونی دەمەقاڵێیەوە كوژراوە.
لە راگەیەندراوەكەدا هاتووە، كەسی بكوژ دوای ئەنجامدانی تاوانەكە شوێنی رووداوەكە بەجێدەهێڵێت و هەڵدێت، بەڕێوەبەرایەتیی ئاسایشی راپەڕین بەدواداچوون و لێكۆڵینەوە دەستپێدەكات و بەبڕیاری دادوەری لێكۆڵینەوەی ئاسایش هەوڵەكان چڕكرانەوە بۆ دەستگیركردنی تۆمەتباری رووداوەكە.
ئاماژە بۆ ئەوەش كراوە، دوای 15 كاتژمێر ئاسایشی راپەڕین توانیان بكەری رووداوەكە لە چیای كۆسرەت دەستگیربكەن و رووبەڕووی یاسای بكەنەوە و لەئێستادا تۆمەتبار بەماددەی 406 لە یاسای سزادانی عێراقی دەستگیركراوە.
