خالید عبدالکریم
ئەوەى لەسەر هۆکارى کێشە و شەڕە خوێناوییەکەی نێوان محەمەدى حاجى مەحمود و عەبدوڵاى برایدا باسدەکرێت، کەمترینن، دیوە شاراوەکان نین، گشتیەکانن، ئەوەى ئەو برا گەورەیەى کرد بەدوژمنى برا بچوکەکەى و ناکۆکییەکانیان تەقییەوە تا ئاستى تەقاندنى ئاڕبیجى و هێرشکردنە سەر یەکتر و جوڵاندنى هێز و شەڕى میدیاى و دەرکردنى یەکتر لەحزب و دەستبەسەراگرتنى موڵکى یەکتر و دەیان کێشەى تر، ئاشکرابوونى نهێنینەکە بۆ محەمەدى حاجى مەحمود.
لەماوەکانى ڕابردوودا جگێرێکى ئیسماعیل قائانیى شەو لەمیوانخانەکەى محەمەدى حاجى مەحمود دەمێنێتەوە( ئێرانیەکان بۆ مانەوە لەهەرێم متمانەیان بەناوبراوە) پێدەڵێت" سیحەتت باش دیارە و سەلامەتى، ماوەیەک پێش ئێستا عەبدوڵاى برات هاتە ئێران و پێوتین بارى تەندروستیت ناجێگیرە و بەکەمى دەتوانێت کارەکانى هەڵبسوڕێنێت( سەرچاوەیەک لەناو سۆسیالیستەوە پێیوتم عەبدوڵا بەئێرانیەکانى وتووە محەمەدى برام توشى زەهایمەر بووە).
دواى ئەم ڕوداوە محەمەد حاجى مەحمود تێدەگات عەبدوڵاى براى ئامادەسازى بۆ جێگرەوەى دەکات و سەرەتاش دەیەوێت لەسەرچاوەى هێزو قەڵەمڕەوییەوە دەستپێبکات کە ئێرانیەکانە و لەوێوە پشتیوانیەکانى لەق بکات، ئیدى لێرەوە ناوبراو بیردەکاتەوە ئەوەى بۆ عەبدوڵاى کردووە لەناو حزب و حکومەت و هەموو شتێک خەریکە بەهەدەر دەچێت، دەستدەکاتە کۆکردنەوەى دۆسییەکانى، بردنى پارە و ئەو خانوانەى کە بۆ سەرکردایەتى حزب وەریگرتووە و نەسرییە و سەرجەم ئەو دۆسێیانەى کە بۆى هەڵگرتووە و تەواوى جموجۆڵى عەبدوڵاى براى دەخاتە ژێر گومانەوە تا ئاستى تەقینەوەى کێشەکان و ئامادەسازى بۆ دەکردنى لەحزب و بەستنى کۆنگرە کە دەبێتە ڕوداوە خوێناوییەکەى گوڵەخانە لەمێژووى ئەو حزبەدا..
