ئەندامێکی لیژنەی دەسپاکی لە ئەنجومەنی نوێنەرانی عێراق ئاشکرای دەکات، ئەنجومەنی نوێنەران دەنگ لەسەر یاسای گەڕاندنەوەی پارە بەقاچاخبراوەکان دەدات.
عالیە نوسەیف ئەندامی لیژنەی دەسپاکی لە ئەنجومەنی نوێنەرانی عێراق رایگەیاند: دەستەی دەسپاکی چەند پڕۆتۆکێلێکی لەگەڵ وڵاتان ئیمزا کردووە بۆ رووبەڕووبوونەوەی گەندەڵی و گەڕاندنەوەی پارە و ئەو کەسانەی تۆمەتی گەندەڵییان لەسەرە.
دەشڵێت: ئەنجومەنی نوێنەران لە ئێستادا کار دەکات بۆ دەنگدان لەسەر یاسای گەڕاندنەوەی پارە بەقاچاخبراوەکان بۆ ئەوەی بڕێکی زۆر لەو پارەیە بگەڕێندرێنەوە.
وتیشی: یاداشت و رێککەوتن لەگەڵ ئەو ووڵاتانەی لە رێککەوتنی بەرەنگاربوونەوەی گەندەڵی نین پێویستی بە یاسایەکی نیشتیمانی ھەیە بۆ ئەوەی عێراقیش بچێتە ناو ریزبەندی جیھانییەوە لەسەر ئەو بابەتە و بەم شێوەیە کارەکانی دەستەکە ئاسانتر دەبێت.
بەپێی خەمڵاندنەکان، کۆی ئەو پارەیەی لە ٢٠ ساڵی رابردوودا براوەتە دەرەوە دەگاتە نزیکەی ٣٥٠ ملیار دۆلار و عێراق چەندینجار داوای لە وڵاتان کردووە ھاوکاری بکەن بۆ گەڕاندنەوەی ئەو بڕە پارەیە، بەڵام ھێشتا پارەکان نەگەڕێنراونەتەوە
.png)