ماوەکانی پێدانی کارەبا لە سلێمانی زیاد دەکات

بەڕێوەبەرایەتی گشتی كارەبای سلێمانی لە ڕاگەیەندراوێكدا ئاماژە بۆ ئەوە دەكات، لەئەنجامی ڕێژەی باران بارینی ئەمساڵ و بەرزی ئاستی ئاوی هەردوو بەنداوی دوكان و دەربەندیخان، ڕێژەی بەردانەوەی ئاو لەهەردوو بەنداوەكە زیادیكردووە و بەم هۆیەشەوە توانراوە سەرجەم یەكەكانی كارۆئاوی بەرهەمهێنانی كارەبا لەو دوو وێستگەیە ئیش پێبكرێت.

ئاشكراشیدەكات، لەبەنداوی دوكان ڕێژەی بەرهەمهێنانی كارەبا گەیشتۆتە 280 مێگاوات و لە دەربەندیخانیش 240 مێگاوات كارەبا، بەمەش بەرهەمهێنانی كارەبا لە هەرێمی كوردستان بۆ یەكەمینجار دەگاتە 3600 مێگاوات كارەبا بە پشتبەستن بەسەرجەم وێستگەكانی بەرهەمهێنانی كارەبا و لەم مانگەشدا ماوەكانی پێدانی كارەبا بۆ 16 كاتژمێر بەرزبووەتەوە.

ڕوونیشدەكاتەوە، وەزارەتی كارەبا بۆ سەلامەتی وێستگەی بەرهەمهێنانی كارەبا لە هەردوو بەنداوی دوكان و دەربەندیخان بەووردی رەچاوی سەلامەتی وێستگەكە و كاری چاكسازیی تێدا دەكات و هەر بەم هۆیەشەوە لە ئێستادا توانراوە هەموو یەكەكان ئیش پێبكرێت.