دەمیكە ریبوار كەریم وەلی نەك وەك ئەركیكی رۆژنامەوانی، بەڵكو وەك هەڵگری ئەجێندایەكی سیاسی دیاریكراو، بڕیاریداوە بەڕاست‌و چەپدا دژایەتیی یەكێتی بكات، دیارە ئەركە دیاریكراوەكەی ئەمەیە، ئەگەرنا جارجاریش لەكۆڵی یەكێتی دەبۆوە ، بۆ ئەم كارەش زۆرجار لەڕێگەی شكاندن یان سوكایەتیكردن بەسەركردەو كەسایەتییەكی یەكێتییەوە دەستپێدەكات، لەئێستاشدا ئەوە بۆ هەمووان روونبۆتەوە، ئەوەی ئەم كابرایە دەیكات تەنهاو تەنها ئەركێكی پێ ڕاسپێردراوە، نەك دیدوبۆچوونی رۆژنامەنووسێكی «سەربەخۆو بەسەلیقە».
ئەمجارەشیان وەك پیشەی هەمیشەیی لەژمارە (318)ی رۆژی (14/7/2014)ی هەفتەنامەی ڕووداودا، جارێكی تر خورییەكەی دەڕێسێتەوەو دكتۆر نەجمەدین كەریم دەكاتەوە ئامانج، وەك ئەوەی یەكێتییەكان نەزانن نیازو مەرامی رێبوار چییەو پەیامی كێ پەخش دەكات، دێت پێشنیازی ئەوە بۆ یەكێتی دەكات گوایە بەقەولی ئەو دكتۆر نەجمەدین لەڕابردوودا دەژێت‌و ئاگای لەڕووداوو گۆڕانكارییەكانی ئێستا نییەو بۆ ئەم دۆخە نوێیە ناگونجێت‌و بەزیان بۆ سەر كەركوك دەشكێتەوە، بۆیە باشتروایە بگۆڕدرێت بەیەكێكی تر.
بەخوێندنەوەی ئەم وتارەی ناوبراو دوو راستیمان بۆ رووندەبێتەوە، یەكەم هەموو پەردەیەك لەسەر ڕووی خۆی هەڵدەماڵێت‌و پێمان دەڵێت كە هەڵگری ئەجێندایەكی سیاسیی دیاریكراوی دژ بەدكتۆر نەجمەدین‌و یەكێتییە، دووەم بەدیقەتدان لەناوەڕۆكی بابەتەكەدا ئەوەمان پێی دەڵێت كە كەسێكی بێ سەلیقەو بێ ئاگایە، جا ئەگەر وانییە دكتۆر نەجمەدین-ێك لەدوا هەڵبژاردندا زیاتر لە (150)هەزار دەنگی لەكەركوك بەدەستهێنابێت كە بەشێكی دەنگی عەرەب‌و توركمانیشی مسۆگەر كردبێت‌و یەكێك بێت لەسەركەوتووترین پارێزگارەكانی عیراق‌و كوردستان، لەبواری ئاوەدانی‌و خرمەتگوزارییدا گۆڕانكاریی گەورەو بەرچاوی لەكەركوكدا كردبێت، لانی زۆری پێكهاتەكانی كەركوك لەسەری كۆك‌و تەبابن، ئەندامی مەكتەبی سیاسیی حزبێكی گەورەو كاریگەری وەكو ی.ن.ك بێت كە هەڵگری سیاسەت‌و گوتاریكی تەندروستی ناوخۆیی‌و ئیقلیمییە، بە چ مافێك ئەم رێبوارە بێ هەڵسەنگاندنێكی واقعیانە خۆی لەقەرەی بابەتێكی وا دەدات‌و ئەوەی لەدەستیدایە كەشفی دەكات، باش وایە ریبوارو هاوبیرەكانی كەمێك ژیرانەتر‌و واقعیانەتر بیر بكەنەوە، ئەوە دكتۆر نەجمەدین نییە مەترسی بێت بۆ سەر ئایندە‌و چارەنووسی كەركوك، بەڵكو ئەوە گوتارو رەفتارو كردارو دروشمبازیی هەندێكە بۆتە مەترسی بەسەر پڕۆسەی یەكلاكردنەوەی چارەنووسی كەركوكەوە، جا بۆئەوەی كەركوك بەئارامی‌و لێبوردەیی‌و پیكەوەژیانەوە بێتەوە سەر هەرێمی كوردستان، پێویستمان بەدكتۆر نەجمەدین و كەسانی وەكو ئەوە، نەك بەدروشمبازیی‌و چاوسوركردنەوە‌و هەڵەی سیاسیی تاكڕەوانە.
