پاشنیوه‌ڕۆی ئه‌مڕۆ 16-7-2014 شه‌ڕو پێكدادان له نێوان هێزه‌كانی پێشمه‌رگه‌و چه‌كدارانی تیرۆریستی داعش له باشووری شاری كه‌ركوك روویداو هێزه‌كانی پێشمه‌رگه هێرشه‌كه‌ی داعشیان تێكشكاندو چه‌ندین چه‌كداریان لێ كوشتن.
له‌وباره‌یه‌وه وه‌ستا ره‌سوڵ فه‌رمانده‌ی ژووری ئۆپه‌راسیۆنه‌كانی باشووری كه‌ركوك به PUKmedia ی راگه‌یاند: پاشنیوه‌ڕۆی ئه‌مڕۆ چه‌كدارانی داعش له هه‌ردوو ناوچه‌ی ته‌ل ئه‌لوه‌ردو بازگه‌ی مه‌كته‌ب خالید هێرشیان كردووه‌ته سه‌ر لیوای (1) و (6)ی هێزه‌كانی پێشمه‌رگه.
فه‌رمانده‌ی ژووری ئۆپه‌راسیۆنه‌كانی باشووری كه‌ركوك ئاشكراشیكرد كه هێزه‌كانی ئه‌و دوو لیوایه به توندی وه‌ڵامی هێرشی چه‌كدارانی داعشیان داوه‌ته‌وه‌و له شه‌ڕێكی گیانبازانه‌دا توانیویانه چه‌كداره‌كانی داعش تێكبشكێنن و چه‌ندین چه‌كداریان لێ بكوژن.
هه‌روه‌ها ئاماژه‌ی به‌وه‌شكرد كه له ئێستاشدا شه‌ڕ له نێوان هه‌ردوولا به‌رده‌وامه‌و هێزه‌كانی پێشمه‌رگه‌ش به‌رده‌وام له پێشڕه‌ویدان و وره‌ی چه‌كدارانی داعشیش له ناوچه‌كه‌دا دابه‌زیوه‌و به‌رده‌وام هه‌ڵدێن.
