سكرتێری ئەنجومەنی ناوەندی یەكێتیی نیشتمانیی كوردستان بۆچونی خۆی لەسەر چونی بارزانی‌و وەفدی یاوەری بۆ بەغدا رادەگەیەنێت‌و دەڵێت، رۆژگار دروستی بۆچونەكانمانی سەلماند، ئێستاش دەبێت گەلی كوردستان بپرسێت كێ لەبرسیكردن و بەهەدەردانی سەروەت و سامانیان بەرپرسە؟
عادل موراد له پێگه‌ى تايبه‌تى خۆى بۆچونی خۆی لەسەر چونی مەسعود بارزانی‌و وەفدی یاوەری بۆ بەغدا دەربڕی‌و رایگەیاند، پێش چەند ساڵێك و لەچەندین بۆنەو پێشهاتی جیاواز زۆر بەڕاشكاوی رامانگەیاند كە تێكچونی پەیوەندییەكانمان لەگەڵ بەغدا خزمەت بە گەلی كوردستان ناكات، دەبێتە مایەی دروست بونی قەیران و گرفتی گەورە بەدوای خۆیدا دەهێنێت و هاووڵاتیان لێ زەرەرمەند دەبن، بەڵام بەداخەوە لەبری گوێگرتن و لێكدانەوەی گونجاو بۆ دیدوبۆچونەكانمان، روبەڕوی زۆرێك تۆمەت و تەشهیركردنی ناڕەوا بومەوە، بەڵام دوای پتر لەچوار ساڵ و بەچونەوەی دەسەڵاتدارنی هەرێمی كوردستان بۆ بەغدا دەردەكەوێت بێ چەند و چون كە قسەكانمان لەجێی خۆیدا بوو.
دەشڵێت "ئێستا دەبێت گەلی كوردستان بپرسێت كێ لەبرسیكردن و بەهەدەردانی سەروەت و سامانیان بەرپرسەو بۆچی و لەپای چی بارودۆخی هەرێم كوردستانیان بەو ئاقارە گەیاند".
