مامۆستا سەلیم ئیبراهیم عەلی، بەڕێوەبەری قوتابخانەی ئامادەیی بانەزێوك نموونەیی لە بەرەی پێشەوەی هێزەکانی پێشمەرگە لە مەخموور گوتی: "بیرۆكەكە سەرەتا لەنێوان من و چەند مامۆستایەكی دیكە گەڵاڵە بوو، دوای ئەوەی قسەمان لەگەڵ شێخ سەعید شێخ رەقیب، بەڕێوەبەری پەروەردەی رواندز و رزگار رەحیم سەرپەرشتیاری پەروەردەیی كرد، ئەوانیش ئامادەیی خۆیان دەربڕی، پاشان رەزامەندی ئاسایشی رواندز و قایمقامیەتی ئەو قەزایەمان وەرگرت و بەكر كەریم، بەڕێوەبەری پەروەردەی هەولێریشمان لێ ئاگادار كردەوە".
"پێمان وایە ئێستا ئازادی قەڵەم پەیوەستە بە لەسەرپێبوونی چەك، بەو ئامانجەشەوە هاتووین و هەستمان كرد نیگەرانییەك دروستبووە لە شاری هەولێر بۆ ئەوەی نیشانی بدەین، كە مامۆستایانیش ئامادەیی تەواویان هەیە بۆ ئەوەی بەرەنگاری هەر مەترسییەك ببێتەوە، كە روو لە هەرێمی كوردستان دەكات" مامۆستا سەلیم، وەهای گوت.
مامۆستا سەلیم، باسی لە ئامادەكارییەكانی خۆیان بۆ چوونە بەرەكانی جەنگ كرد و گوتی، "هەندێك لە مامۆستاكان چەكی خۆیان هەبوو، بەڵام ئەوانەی چەكمان نەبوو مووچەی سێ مانگمان كۆكردەوە و بەچەك و فیشەکماندا".
ئەو مامۆستایە هەروەها گوتی: "كاژێر 5 ی سەرلەبەیانی ئەمڕۆ شەممە 9.8.2014 بەپاسێك بەڕێكەوتین، لەنێو پاسدا هەموو ئایدۆلۆژیا و بیروڕایەكی جیاوازی سیاسیمان تێدایە، بەڵام یەك ئامانجی باڵای نەتەوەیی كۆیكردووینەتەوە، كە هەموو بیروڕا حیزبییەكانی كاڵكردووەتەوە".
ئەو مامۆستایە گوتیشی، "ئێستا لە بەربەستەكانی بەرەی پێشەوەی جەنگین لە مەخموور و پەیوەندیمان بەو هێزەوە كردووە، كە نەجات عەلی، بەرپرسی لقی 23ـی مەخموور سەرپەرشتی دەكات و لە بەرزاییەكانی دەوروبەری مەخموورداین و نزیكەی 8 كیلۆمەتر لە مەخموورەوە دوورین، ئێستا فەرماندە سەربازییەكان لەو بەرەیە لە كۆبوونەوەدان و دوای كۆبوونەوەكە دابەشمان دەكەن".
مامۆستا سەلیم ئیبراهیم باس لە كەشوهەوای بەرەكانی جەنگ دەكات و دەڵێ: "كەشوهەوایەكی زۆر خۆشە و ئامادەین خزمەتی خۆمان لە سەر وەزارەتی پەروەردەوە بگوازینەوە سەر وەزارەتی پێشمەرگە و تاوەكو هەر كاتێك پێویست بێت لێرە بمێنینەوە، تاوەكو ئێستا نەكەوتووینەتە نێو هیچ رووبەڕوبوونەوەیەك لەگەڵ چەكدارانی داعش".
هەروەها داوا دەكات، مۆبایل لە هێزەكانی پێشمەرگە قەدەخە بكرێت و دەڵێ: "ئێمە میللەتێكی عاتیفین و قسەكردنی بەردەوام لەگەڵ ماڵەوە كاریگەری دەبێت لەسەر ورەی پێشمەرگە، هەندێك پێشمەرگە بە سكایپ قسە لەگەڵ منداڵەكانیان دەكەن، دەبێ پێشمەرگە تەواو لەگەڵ كەشی شەڕ بگونجێ و پابەند بێت".
.jpg)
