وەزارەتی دادی عێراق ئاشکرایکرد، ئەو زیندانیانەی یاسای لێبوردنی گشتییان بۆ دەرچووە ژمارەیان گەیشتە نزیکەی هەشت هەزار زیندانی لە سەرانسەری سەرجەم چاکسازییەکانی عێراقدا.
ئاوێنە: بەپێی راگەیەندراوێکی وەزارەتی دادی عێراق کە ئەمڕۆ سێشەممە بڵاویكردووەتەوە، هاتووە "بەگوێرەی یاسای لێبوردنی گشتی و بەپێی رێکارە یاساییە دامەزراوەکان و دوای تەواوکردنی پشکنینی ئەمنی، حەوت هەزار و ٩٩٥ زیندانیی ئازادكراون".
ئەوەش هاتووە "ئەوانەی شایستەی لێبوردنەکەن لەسەرانسەری پارێزگا جیاوازەکانی عێراقدان و بڕیارەکەش ئەو زیندانیانە لەخۆدەگرێت، کە مەرجەکانی یاساکەیان تێدایە بە هەردوو جۆری نێر و مێ".
لەکۆتایی راگەیەندراوەکەدا ئەوەش خراوەتە روو، جێبەجێکردنی یاسای لێبوردنی گشتی لەچوارچێوەی پابەندبونیاندایە بە بەرەوپێشبردنی بنەماکانی دادپەروەری و گەیشتن بە دەرفەتەکانی یەکگرتنەوەی کۆمەڵایەتی، لە هەمانکاتدا بەردەوامە لە چاودێریکردنی جێبەجێکردنی یاساکە بە شەفافیەت و وردبینییەوە.
