[full_width]
به‌رپرسی پێشووی ده‌زگای راگه‌یاندنی پارتی دیموكراتی كوردستان چه‌ند دیمه‌نێكی شه‌ڕی ناوخۆی ساڵی 1994ی نێوان یه‌كێتی و پارتی بڵاوكرده‌وه و ده‌ڵێت: " ئەگەر لێی فێربن، جارێکی تر نایبیننەوە."
سه‌رۆ قادر له‌پێگه‌ى تايبه‌تى خۆى له تۆڕى كۆمه‌ڵايه‌تى فه‌يسووك نوسیویه‌تی: "لە یادی یەک ساڵەی سوتاندنی بارەگاکانی پارتی دیموکراتی کوردستان لە کەلار و قەڵادزێ و چەند شاری دیکەی سنوری پارێزگای سلێمانی، منیش ئابلوقەدران و سوتاندن و تاڵان کردنی دەزگای ڕۆشنبیریی و ڕاگەیاندنی گوڵان وەک بەڵگەیەکی عیبرەت لە ئەنجامەکانی شەڕخوازیی وەرگرتن، بڵاودەکەمەوە."
سه‌رۆك قادر باس له دیمه‌نه‌كانی ناو ئه‌و گرته ڤیدیۆییه ده‌كات وده‌ڵێت: "ئەوە ژێرزەمینی هوتێل شیراتۆنە، ستۆدیۆکان و ژووری من دیارە لە چ حاڵێکدان. لەوکاتدا بارەگاکانی پارتی لە هەولێر، گیران و سوتێندران. سەرکردە سیاسییەکانی شەڕخواز هەر ئەمانەی ئێستا لە سلێمانی و شارەکانی دیکە، لە ئاژاوە ناوەستن، ئەوکاتیش(بیست دوو ساڵ لەمەوپێش) هەر ئەوان بوون دەیانگوت: هەولێر کوێی پیرۆزە تا شەڕی تیا نەکرێ!"
له كۆتاییشدا ده‌ڵێت: "بەڵێ شەڕی ناوخۆ بەبێ ئامانجی سیاسی و ئیداری هەڵنەگیرسا. کۆتاییەکەشی دیارە چۆن بوو، پارسەنگ لە کوێ شکێندرا و کۆتایی بە شەڕ هێنا. ئەگەر لێی فێربن، جارێکی تر نایبیننەوە."
