سیسک فابریگاس ئەستێرەی نوێی یانەی چێلسی جارێکیتر دڵخۆشی خۆی دەربڕی بە پەیوەندی کردن بە شین پۆشەکانەوەو ڕایگەیاند کە ئەو بۆ جێگرتنەوەی فرانک لامپارد نەهاتووە.لەلێدوانێکیدا بۆ تۆڕی "سکای سپۆرتس"ی بەریتانی، فابری وتی :"پێم وابێ من لەتەمەنێکی گونجاودام، ویستم گۆڕانکاری ئەنجام بدەم، خوێندنەوەم بۆ سەرجەم ئەو گرێبەستانەکرد کە پێشکەشمکران، دوای چەندین گفتوگۆ بڕیارێکی دروستمدا بە پەیوەندی کردن بە بلوزەوە".
وتیشی :"ئامانجی من بردنەوەی سەرجەم نازناوەکانە لەگەڵ تیپەکەم، وەرزی ڕابردوو هیچ شتێکیان نەبردەوە ، لەبەر ئەوە چێلسی لەم وەرزەدا زۆر باشتر دەردەکەوێت".
لەسەر بەراورد کردنی لەگەڵ فرانک لامپارد ، فابریگاس وتی :"شوێنی سەرەکی من ناوەندی یاریگایە و مۆرینهۆش ئەوە دەزانێت ، بەڵام لەبەرشلۆنە فێری ئەوە بووم لە چەند شوێنی جیاواز یاریی بکەم ، من جێگرەوەی لامپارد نیم ، ناتوانم وەکو ئەو گۆڵی سەرنج ڕاکێش تۆماربکەم ، من زیاتر حەزم لەگۆڵ دروستکردن دەکەم ، ئێمە دوو یاریزانی جیاوازین ".
جێی ئاماژەیە خۆسێ مۆرینهۆ هەفتەی ڕابردوو لەلێدوانێکیدا ڕایگەیاند کە فابریگاس ناتوانێت جێگەی فرانک لامپارد بگرێتەوەو ئەو یاریزانەشی بۆ ئەو مەبەستە نەکڕیوە.
