هێزه‌كانی پێشمه‌رگه‌ ئۆپراسیۆنی ئازادكردني گونده‌كانی باشورو خۆرئاوای كه‌ركوكیان ده‌ستپێكرد

سه‌عات چواری ئه‌مشه‌وه‌وه‌ به‌بۆردومانكردنی گونده‌كانی باشورو خۆرئاوای شاری كه‌ركوك ده‌ستپێكردوه‌و هێزه‌كانی پێشمره‌گه‌ له‌پێشڕه‌ویدان . 

سه‌رچاوه‌یه‌ك له‌هێزه‌كانی پێشمه‌رگه‌ رایگه‌یاند: له‌سه‌عات 04:00 ی ئه‌مشه‌وه‌ فڕۆكه‌ جه‌نگیه‌كان و تۆپخانه‌كانی پێشمه‌رگه‌ به‌چڕی گونده‌كانی باشورو خۆرئاوای شاری كه‌ركوك بۆردومان ده‌كه‌ن و زیانی زۆر گه‌وره‌یان به‌داعش گه‌یاندوه‌. 

وتیشی: له‌گوندی سه‌ید خه‌له‌ف بۆردومانی چه‌ند مۆڵگه‌یه‌كی گرنگی داعش كراوه‌و پێنج ئۆتۆمبێلی سه‌ربازی داعش له‌كاتی هه‌ڵاتندا سوتێنراون و كۆگایه‌كی چه‌ك و ته‌قه‌مه‌نیش ته‌قێنراوه‌ته‌وه‌.

رونیشكرده‌وه‌: له‌سه‌عات 06:00 ی سه‌رله‌به‌یانیشه‌وه‌ هێزه‌كانی پێشمه‌رگه‌ و دژه‌ تیرۆر ده‌ستیان به‌پێشڕه‌وی كردوه‌و له‌به‌رنامه‌دایه‌ چه‌ندین گوندی تر له‌تیرۆرستانی داعش پاكبكرێنه‌وه‌و پێشمه‌رگه‌ تاكو كه‌ناره‌كانی قه‌زای حه‌ویجه‌ پێشڕه‌وی بكات . 

جه‌ختیكرده‌وه‌: تاكو ئێستا هیچ زیانێك  له‌هێزه‌كانی پێشمه‌رگه‌ و دژه‌ تیرۆر نه‌كه‌وتووه‌ته‌وه‌و شه‌ڕ به‌رده‌وامه‌ .