لە گەڕەكێكی شاری هەڵەبجە نارنجۆكێك ھەڵدەدرێتە ماڵی ئەفسەرێكی پێشمەرگە كە هاوكات كادیری پارتی دیموكراتی كوردستانە و ئەو ئەفسەرەش دەڵێت، كێشەی كەسی لەگەڵ كەسدا نییە.
نەقیب نەریمان ئیمامی ، ئەفسەری پێشمەرگە ، كە هاوكات كادرێكی پارتی دیموكراتی كوردستانە بە میدیاكانی نزیك لە حزبەكەی راگەیاندووە: درەنگانێكی شەوی پێنج شەممە لەسەر هەینی نارنجۆكێك فڕێ دراوەتە حەوشەی ماڵەكەیان ، هەرچەندە هەندێ زیانی ماددی بە ماڵەكە گەیشت ، بەڵام هیچ زیانێكی گیانی بەدواوە نەبوو.
باسی لەوەشكردووە: "هۆكاری فڕێدانی ئەو نارنجۆكە نازانم ، چونكە هیچ كێشەیەكی كەسییم لەگەڵ كەسدا نیە و گومانیشم لەكەس نیە ، بەڵام ڕەنگە بەهۆی بابەتی سیاسییەوە بووبێ ، چونكە من جگە لەئەوەی ئەفسەرم هاوكات كادیرێكی پارتی دیموكراتی كوردستانیشم".
ئاماژەی بۆئەوەش كرد كە لەدوای ڕووداوەكە هێزە ئەمنییەكانی هەڵەبجە چوونەتە شوێنی ڕووداوەكە و لێكۆڵینەوەیان دەستپێكردووه بەڵام تاوەكو ئێستا ئەنجامی لێكۆڵینەوەكان ڕانەگەیەنراوە.
پێشتر فازڵ بەشارەتی، بەرپرسی لقی 12ی پارتی دیموكراتیی كوردستان لە ھەڵەبجە، ڕایگەیاندبوو، كە ڕاستەوخۆ و ناڕاستەوخۆ هەڕەشە لە بارەگا و كادیر و ئەندامانی پارتی لە ناوچەكە دەكرێت.
